Ххуй-хъиншиврийсса хьунабакьаву

Октябрьданул 25-нний ЧIяйннал шяраву Украиннайсса хасъсса аьралий операциялий гьурттушинна дуллалисса Нариман МахIаммадаьлиев Ккуллал райондалул жяматрал шадлугърал тагьарданий хьунаавкьунни. Донбассрай аьралий операция байбивхьусса гьантрайва Нариман гьуртту хьуну ур яла цIу думи кIанттурдай ва ккаккан бувну бур цува хIакьсса аьраличу ушиву. Му ишгу хIисаврайн лавсун, ва итаавкьуну ур отпускрай.


Солдатнал хьунин тIутIащал ва балайрдащал бувккун бия нину-ппу, гъан-маччами, райондалул ва шяраваллил бакIчитал, щарнил ва лагма-ялттусса шяраваллал жяматру. БатIаву хьунни СССР-данул Виричу Ц1аххуй Маккаевлул гьайкалданучIа. Шадлугъ дачин дурну ия бусравсса чIяйричу МахIаммад Апанниев. Шадлугъ тIитIин махъ буллуна Ккуллал райондалул бакIчи Шамил Рамазановлухьхьун:
– ХIакьину жула ватанлувтал Аьрасатнал аьралуннал кьюкьравух ва Донбасс Республикалул хушрай лавгсса аьралуннал кьюкьравух бур. ДакI дарцIуну ура, паччахIлугърал бивхьусса буржгу лайкьну биттур буллай, зу виртталну нацистътурайн данди бацIлай бушиврий. Барчаллагь тIий ура зухьгу, аьралий дустурахьгу! Зу хъанахъиссару мяйжаннугусса патриотътал ва вирттал, – увкунни ванал.

Хъирив махъру лавхъунни шяраваллил бакIчи МахIаммад Билаловлул, ЧIяйннал школалул директор Альбина ХIаммаккуевал ва хъамаллурал. БавтIцириннал аьра­литуран чIа увкунни цIуллуну-цIакьну, ххувшавугу ларсун, чIумуй ичIунмай зана бикIаву.
Хъирив ккаккан дуруна хъун дакъасса концерт, дуклаки оьрчIал дурккуна дяъвилул ишир­ттан хас дурсса назмурду.
Нариманнул ва ванал нитти-буттал хъунмасса барчаллагь увкунни бавтIцириннахь ва аьралитуран чIа кунни сагъну-саламатну чIумуй зана шаву.