Совет Союзрал кIийла Виричу АхIмад-Хан Султан увсса кьини, октябрь зурул 25-нний, МахIачкъалаливсса ванал гьайкалданучIан бавтIун бия лакрал агьали.
БавтIцириннавух ия Виричунал аьралий гьалмахчунал, машгьурсса генерал Тимофей Хрюкиннул арснал арс, Дагъусттаннал предпринимательствалул ва инвестициярттал министр Артём Хрюкингу. Ванал цала ихтилатраву кIицI лавгуна АхIмад-Хан Султаннул щалва оьрму ва цалунмасса ца гьунар кунмасса бивкIшивугу, Ватандалуха дакI тIайлану къуллугъ буваврил эбратнугу хъанахъишиву. Бувсунни цала ужагърай мудангу хIурматрай зумух ласайшиву Виричунал цIа. АхIмад-Хан Султаннул ссурахъил арс Сайдун ХIажикьурбановлул бувсунни генерал Хрюкин АхIмад-Ханнул чIарав авцIусса иширттая, къиримнал татар репрессиярттал щатIахьхьун биривсса ппурттуву ми ххассал буваншиврул АхIмад-ханнул нину-ппу Хрюкиннул цаламинначIан гьан бувну бивкIшиву ва АхIмад-Ханнун академиялувун уххангу, самолетирттал тагьар ххал дигьлагьисса институтраву зунгу кумаг бувну бивкIшиву.
1-мур ЦIувкIратусса аьралий лётчик, авиациялул полковник, Аьрасатнал лайкь хьусса аьралий лётчик, Москавлиясса хъамаличу Рамазанов Рамазаннул бувсунни цува оьрчIнияцIава щаллагу дунияллул ва совет авиациялул пахрулунсса АхIмад-Хан Султаннул оьрмулул хъирив агьну ивкIшиву ва летчикнал пиша язи бугьаврил гьанумур сававгу АхIмад-Хан хьушиву.
Цува АхIмад-Ханнул нитти-буттачIа Къиримнаву яхъанай ивкIшиву, Виричу оьрмулуву, самолетирттаха дуниял хъамариртун, думуний гьашиву дуллай, тачIав цичIав тIалав къадуллалисса, ас-ламус бусса, хьхьичIун урувгсса ивкIшиву бувсунни ванал гъанчу АбутIалиб ХIандаевлул. КIицI лаган аьркинни ва оьрмулул 91 шин хьусса хъуначу Каспийскалия увкIшиву.
Бусравсса чиваркIуннал – МахIаммад Айдаевлул, АьбдурахIман Халиловлул ва Супиян Оьмаровлулгу цалвами ихтилатирттаву кIицI лавгунни Вирттаврал аьпалул хIурмат бюхттулну бикIан аьркиншиву. – ХIакьину Украиннал аьрщарай чIявусса Дагъусттаннал жагьилталгу бур жулва билаятрал мурадру буруччаврил цIаний ярагъ кIунттил бувгьусса. Тайгу виртталсса ппухълуннал наслур. ЦIуллуну-сагъну шаппа-шаппай зана хьуннав ххувшаврищал! – увкунни Сайдуннул, бавтIцириннахь барчаллагь тIисса ихтилатрайну митинг къуртал дуллай.
Бусанна оьрмулул бугьарасса АхIмад-Хан Султаннул ссурахъу Алла Аппазова Дагъусттаннайн бучIан дакIний бивкIшиву ва кьини лакращал архIал гьайкалдануцI тIутIив дишин, амма, къашай хьуну, бучIан къавхьушиву. Ванил дакI дуван кунма, на ваничIан гьан дурссия рирщуцири суратру. – Буси на хъунмасса барчаллагьрай бушиву Дагъусттаннал агьалинайн хасну. На хъунма хьуссара АхIмад-Ханнул буттал къатрай, цаяр дакI хъинсса, чувшиву дусса, авурсса инсан цама къакIулли. Амма, ласгу, ппугу хIисаврай, талихI бакъасса ия, давриха, самолётирттаха арсурваврах дагьайкунсса къулагъас дувансса чIун мунал дакъая, кулпат Иннагу тарбиялул мухIлу-хIин кIулсса бакъая, оьрчIру ттюнгъану, хъихъину хъуни бувну бия. Арсурваврал наслу так ца Вероника бур, Станислав тIима арснал душ, ванил ва ванил ласнал ( ва украин миллатрал инсан ур) Амет-Хан тIисса фамилия ларсунни, щукрурхха ва фамилиярагу дусса. Нагу ва кьини мизитравун лавгра, имамнахь дуаь дува учин тавакъю буван, дакIнийн утлай, буслай бивкIра цукун ххаллилсса ивкIссарив лаккучунал-зунтталчунал ва къирим-татаркал, ттулла ниттилссил, арс. Жура ядан аьркинссар совет агьулданул цIакь дурсса дусшиву. Чара бакъа цал уттигу биян ччай бура ЦIувкIрав, гъинттул бучIансса тамахIрай бура, АхIмад-Ханнул буттал шяраваллих цал уттигу ябитан, ванал ппу дунияллийн увксса къатраву щябикIан,– увкунни Алла ХIусмановнал.
