Аьлимтурал мажлис ЦIуминалий

Ларгсса ххуллункьини ЦIуминалийсса ЦIуссалакрал шяраву Рабиуль-авваль зурун хас бувну хьунни райондалул аьлимтурал мажлис. Ва мажлис усттарну бачин бувну ия ЦIуминалийсса ЦIуссалакрал райондалул Имамтурал советрал хъунама Мансур Хаваев.

МухIаммад Идавсил (с.аь.с.) тIутIинийх бачирча, жунма чара бакъа тIайлабацIу хьун­тIишиврия, ппухълуннал диндалул хIурмат лахъну бикIан аьркиншиврия, исламрал диндалул ххуллу-хха бурувччуну къуццу тIун аьркиншиврия, жагьилтурал ва оьрчIал диндалул кIулшивуртту цIакьгу, куртIгу дуллан аьркиншивриясса ихтилатру бувна. Гьуртту хьуна тамансса мюрщи оьрчIругу. Арцуйнусса бахшишру дуллалисса викторинагу дия вайннан, МухIаммад Идавсил (с.аь.с.) оьрмулия цуманан ххуйну кIулну бурив ккаккан бувансса.

Райондалул оьрмулул иширттавух чялишну гьуртту хъанахъиминнан Мансур Хаваевлул Барчаллагьрал чагъарду буллуна. КIицI лаганну вайннал цIардугу: уссурвал ХIасановхъул, Назим Шайхаьлиев, ХIабибуллагь Шагьмарданов, Мурад Давудов,МахIач Акаев, Умар Хаваев, Аьбдуллагь Исяев, Аьбдурашид Мутаев, Анвар Шарипов, Ибрагьимдибир Ибрагьимдибиров.
– Лакрал цIусса миналий мизитру буллай, диндалух дагьайкунсса къулагъас дуван хIарачат буллай тиккусса шяраваллаву зузисса имамтал, ЦIуминалий хьусса ва мажлисрал барачатгу щалвагу жяматрайнгу, миллатрайнгу бияннав, укун цачIун батIавриву, ккур­кки лагавриву диялсса ххуйшивуртту ва хъиншивуртту дуссар, хайр-мюнпатсса ихтилатру хьунни, агьали рязину ливчIунни, – увкунни «Ислам Лаккуй» порталданул администратор Арсланаьли Сулаймановлул. Сурат­ругу ваналли.