Аьрасатнал гуж – агьалинал цашиврувур

Октябрь зурул 25-нний «Россия — Моя история» тарихийсса паркраву хьунни республикалул форум «Россия — Моя история». Ва хIадур дурну дия Республикалул Национал политикалул ва диндалул иширттал министерствалул.

[dropcap]Ф[/dropcap]орумрал дайдихьу дуллалисса махъ лахълай, министр Энрик Муслимовлул барча дунни ялун нанисса байран – ноябрь зурул 4-нний кIицI лагантIисса Аьрасатнал Цашиврул кьини.
– Аьрасатнал паччахIлугърал тарихраву билаят бух хьусса ишру къабивкIссар. ДакIнийн рутанну Надир-шагь ххит увсса 1741-ку шин, польшанал интервентътурая Москав тархъан бувсса 1612-ку шин, 40-ку шинну ва 1999-ку шин. Дагъусттаннал агьали ца хьуну гьаз хьуссар душмантал бух буван, цIанакул, спецоперация нанисса ппурттувугу жува ххув хьунтIиссару, – увкунни ванал. 

Чачаннал Жяматийсса палаталул вакил Лайлаъ Аюбовал, Къабардин-Балкьарнал МВД-лул Жяматийсса советрал председательнал хъиривчу Ирина Кишуковал ихтилатругу Аьрасатнал билаятрай агьали бавкьуну, нахIуну яхъанан аьркиншиврия, ватандалухсса ччаву ялун нанисса никираву цIакь дуллан аьркиншиврия ва му ххуллий­сса давуртту ягин дуллан аьркиншиврия бия. Дагъусттаннал Хъаннил союзрал председатель Интизар Мамутаевалгу кIицI лавгунни щалла дунияллун жулла цашиву ккаккан дуван аьркинсса чIун дуркIшиву.

Аьрасатнал Ветерантурал союзрал Дагъусттанналмур ккурандалул каялувчи МахIаммад Хадулаевлул бувсунни Украиннавусса нацизмрал мархха-ххуну ххартI буван аьркиншиву, динну ва миллатру личIи къабувну, Аьрасатнал агьали кьини дуркний ккур­кки лагайшиву ва уттигу мукун цахьуну кьянкьану бацIантIишиву. Форум къуртал хьуну махъ ккаккан дунни концерт.