Арцущалсса сумка бавцуну бур

Октябрь зурул 21-нний МахIачкъалаллал Советский райондалул полициялул отделданийн аьрзирай увкIун ур 26 шинавусса жагьил. Ванал бувсун бур цачIава хъамалу бивкIсса 24 шинавусса душнил 55 азарда къуруш арцущалсса цала сумка бавцушиву.
Полициялул зузалтрал, ва отделданийн бувцуну, цIухху-бусу бувну бур. Ванил бувсун бур квартиралул заллу дустуращал балкондалийн увксса чIумал бавцушиву цила мунал сумка. Яла, такси бувгьуну, дялахърулул клубравун лавгун, дачIи арцу микку харж дурну дур, дачIиннух цинна аьркинмур ларсун дур.
Ва иширал хIакъираву уголов дело сукку дурну дур.

Инсан оьрмулуцIа ан кьаст лархIуну дур

Октябрь зурул 23-нний Бабаюртуллал полициялул отделданул дежурная частьрайн оьвкуну бур 28 шинавусса шиччавасса хъамитайпалул. Ванил бувсун бур кIулакъасса адаминал, цила къатлувун увххун, бензин бувтIуну, цуппа ччуччин кьаст лархIушиву.
Ва иш хьусса кIанайн бувкIсса полициялул зузалтран ляркъуну дур дачIрасса пластикрал шуша, бензин бусса шуша ва зажигалка.
Полициялул зузалтрал, кIул увну, отделданийн увцуну ур щак багьлагьима. Ва ур, хьхьичIвагу танмихIрайн кIункIу увну ивкIсса, 33 шинавусса, Бабаюртуллал шяравасса адамина. Ванал бувсун бур хъамитайпалухь цува щарсса дусса цала дуснащал хьунамабакьларда тIий ивкIшиву, му мютIий бан къавхьушиву.
Ссибивзсса адаминал му ччуччин кьаст лархIуну дур. Амма зажигалка къалархъун, хъамитайпа ххассал хьуну бур.
Ва иширал хIакъираву полициялул зузалтрал дартIсса материал Дагъусттаннал Силистталул управлениялул Силистталул комитетрайн дуллуну дур.

«Баян бува чув бахлай буссарив бивкIу»

Гьарица шинах щалагу Аьра­сатнаву байссар «Баян бува чув бахлай буссарив бивкIу» цIанилусса, наркотикру ишакаш баврийн къаршисса операция.
Ванил мурад бур закондалул ххуттава бувккун наркотикру ишакаш баврийн, ми ишла баврийн къарши бацIаврил, вихшалдарал телефондалийн бувкIсса информация кьамул баврил, наркотикру ишла буллалими хъин баврил ва миннал реабилитациялул давурттавух жямат гьуртту баву.
КIицI лавгсса операциялул кIилчинмур ятапI най буссар октябрь зурул 17-нния байбивхьуну 28-ннийн бияннин. Ванил лагрулий буккинтIиссар наркотикирттайн къаршисса лекцияртту школардай, ССУЗ-ирттаву, ВУЗ-ирттаву.
Шикку гьуртту хьунтIиссар УКОН-лул, МВД-лул балугъравун къабивминнал иширттал­сса буллалисса инспекциялул зузалт, администрациярдал вакилтал.
Жагьи-жугьулнахь бу­сан­тIиссар наркотикирттая ва психотропный затирттая инсаннал цIуллу-сагъшиврун цуксса зарал буссарив, ми ябуллалими ишла буллалими ва ппив буллалими ци жавабрайн буцайссарив. ОьрчIан ккаккан дантIиссар ва темалийсса видеортту, дачIинтIиссар наркотикирттайн къаршисса листовкартту.
ДакIнийн бутан, наркотикру ябуллалаврия, бахлахаврия, ишла буллалаврия, мукунма миннул реклама дуллалаврия баян бан хьунтIиссар УКОН-лул вихшалдарал телефондалийн ва номерданий: 8(8722) 994-994.
Гьарица информациялул хъиривлаяву дантIиссар. Оьвкуманал цIа-бакI ашкара къадантIиссар.

КIия инсан оьрмулуцIа хьунни

Октябрь зурул 24-нний, ссят 21.10 хьусса чIумал, Ха­савюрт-Солнечное машиналул ххуллий «Мерседесрай» нанисса Къумтуркъалаллал райондалиясса 60 шинавусса адаминал, кIурааллалисса кIанттурдай ххуллу къабуллуну, щун бувну бур «Лада-Гранта» машиналийн. Ванил рульданух ивкIун ур Хасавюртуллал райондалиясса 21 шинавусса жагьил. Ва ДТП-ву «Лада-Гранта» машиналий най ивкIсса ЦIуссалакрал райондалиясса 21 шинавусса жагьил анаварсса кумаграл машиналуву къуртал хьуну ур. КIивагу машиналул шупIиртал, цIунцIияртту хьуну, азарханалийн биян бувну бур. «Мерседесрал» шупIир Хасавюртуллал азарханалий къуртал хьуну ур.
Ва иширал хIакъираву материал дартIун дур.

Скутер машиналийн щуну дур

Октябрь зурул 25-нний, ссят 21.30 хьусса чIумал, Семендер поселокрай, М. Мусаевлул ва А. Бондаренкол цIанийсса кIичIираваллал шанбачIулий, скутерданий нанисса 17 шинавусса жагьилнал щун бувну бур чIарах нанисса «ВАЗ-2190» машиналийн. Ванил рульданух ивкIун ур Семендер поселокрай ялапар хъанахъисса 29 шинавусса адамина. Скутерданий най ивкIма, цIунцIияртту хьуну, азарханалийн иян увну ур.