Я кIирину кIиришиву дакъасса, я дяркъуну дяркъу дакъасса, зунгу, занангу къулайсса ссут ишла дувара зулла цIуллу-сагъшиврун ва къатлун мюнпатну. Сакин дувара зура ва ссутнил махъва-махъсса барз къуртал хьуннин дуван аьркинсса давурттал сияхI. Жулмур укунсса хьунни.
Гъинтнил янна –
архмур чIамуйн
Гъинттулсса янна-ус, марцIгу дурну, лахъан дувара яла лахъмур чIамуйн, кьурукIинтнил шанавун. Ягу, къуршаву дирхьуну, дукьара архмур мурцIнийн.
Гардеробрал «ревизия»
Янна гъинттулсса дукьлай, кIинттулсса дуккан дуллай бунува, личIлулну бургияра, дурив миннуву махъсса ца-кIира шинай зура чурххайн лаян къадурсса янна, ччан къабувкIсса усру, пикри бара, ваксса хIаллай ишла къадурсса затру вания тийннайгу аьркин хьунтIиссарив. КIанугу бугьлай, гихуннайгу дитаяр, дулара мюхтажнан, ихIсандалул фондирттайн. ЧIамурдаягу, аьмну къатлувагу ххимур, аьркин дакъамур дакъа дуркун, ласласисса ссихIгума куклу хьунтIиссар, къатлуву кIанугу, чанигу ххи хьунтIиссар.
Интернет дакъасса кьини
Яругу, бакIгу, каругу дигьалаган дуваншиврул, чIун-чIумуй дулувара интернет дакъасса кьини – соцсетирдавусса хаварду бувагу ххал мабулларду, маккаларду, хаснува дакI зия дуллалими. Телевизорданух, компьютерданух гьан дувайсса чIун харж дувара мюнпатсса цамур даврин, масалдаран, лу ккалаккаврин ягу, бувккун кьатIув, марцIсса гьавалийсса сайрданун. Зуйра зура къадагъа дирхьуну, телефонгу, чара бакъул дакъа, канихьхьун маласари.
Зулла арцух
зунма
зарал мабулларду
Масалдаран, кьаритлай кьаритан къашайсса къалиян учаву, зулла цIуллу-сагъшивугу, диц-куцгу, оькки дарча дакъа, ххуй къадуллалисса. Зулла арцух, зулла карунних зунма зува зарал мабулларду. ЧIалачIи бувара зунмагу, зулвацириннангу зувува аьркин дакъасса хасиятру кьаритансса гуж бушиву, зува мийннуяр ххувсса бушиву.
Макьу
дакьиншиврул
ДакI дакъа, цичIав дуллансса цукунчIавсса гъира бакъасса чIумал, зулла нярайгу, чурххайгу зулму мабулларду, дуллан къаччимур гужирай мадулларду. Цал-цал (явара, анжагъ цал-цал) курчIилшиврухьхьун изму булавугу мюнпатссар. ДакIнил хIал ххуй баншиврул ласира зунна цIусса янна, ус, насира салондалувун зухава къуллугъ буван. Машан ларсун, лахъира эфир аьгъушивурттащалсса (мандариндалул, майорандалул, мелиссалул, лавандалул) аромалампа, мунихун чул бувара 20-30 минутIрайсса – зун асар хьунтIиссар зулла тагьар чIаланну къулай хъанахъисса куц.
БатIияра ссутнил кацIру
Дарщу-дарккусса ссутнил гьантрай яргсса рангру ххи дуваншиврул, паркрава, багърава бавтIун, къатраву бишияра ссутнил кацIру (тIутIал бикIу, мурхьирдал чIапIал бикIу). Рангру гъинттулминнуяр къалувсса, ятIул-хъахъисса кацI бишара яла чIалачIимур кIанай – зулла дакIгу, яругу ххари буллан.
