Ссут бизаршиврул чIунни тIими бяйкьлакьиссар. Ссут гъинттул дуван ка хъирив къалармур, мутта биял къавхьумур дувансса яла хъинмур чIунни. ТIабиаьтрал цичIара думи рангру мяш дакъа жунна дулайсса чIунни. Жула оьрмулуву уттинин къадурмур дуллансса, уттинин къакIулну бивкIмур лахьлансса чIунни. Ци-дунугу дуллай байбишинну тIий, най къадияйсса «понедельник» дирсса ягу дагьлай цукунчIав къадагьайсса дюхъ дагьсса чIунни дуркIсса, гьунттийнин къадитлай, данмур цIана дуллай байбишинсса. КутIану учин, бизаршивугу, депрессиягу чIяруну курчIилминначIанни дучIайсса.
Ссуттил депрессиялухьхьун къабириян
* * *
Гъинттулсса затру, янна дикIу, ичIурасса матахI дикIу, дукьияра. Дакъа дувара зура ишла къадуллалисса затру. Экьидичин хIайп тIий бухьурча, дустурайх, кIулминнайх дачIияра. Буххан бувара къатлувун цIусса гьава, ласияра неъмат гьарта-гьарзашиврия ва марцIшиврия.
* * *
КъакIулмур кIул буллан, цIусса пиша-сянатру лахьлан, ци оьрмулуву бухьурчагу, тачIавгу къачIалссар. Мисалдаран, цIусса маз лахьлан, сурат дишин, гьузун, къавтIун, ласапIитIрай бигьин лахьхьин.
* * *
Гъинттул кIиришивруха газрал пачличIан гъан хъананмагума ччан къабикIайва. Ссутрив, кулпатравуми ххари буллан, нахIу дукрарду дуллансса яла хъинмур чIун дур. НахIусса дукралулгурхха инсаннал дакIгу, яругу ххари бувайсса. ДакIнийн дутияра зулла яла хъинми рецептру, ххал дувара цIу-цIусса цайми.
* * *
Ккаккира уттинин ххал дуван къархьусса фильмру, ккалаккира луттирду, заназияра театрдавун.
* * *
Паркирдавун, шагьрулул кьатIув заназира, яру ссутнил караматсса суратирттайну ххари буван. Рищара зуллагу, тIабиаьтралгу хъин-хъинсса суратру. БатIияра ссутнил кацIру, шаппа бивхьуну, зулва яру ххари буллансса.
* * *
ХIарачат бувара уттининнияр ччяни уттубишаван. Чани бумур чIун чIири лирчIсса ппурттуву ххишаласса шану чурххан чара бакъа аьркинссар.
* * *
Дувара зущара уттинин дан къархьусса, дуван дакIнийсса давурттал сияхI. Миннувух дикIантIиссар ччясса чIумул мутталий дуван шайссагу. Най дуна дувара мукунми.
Хъунмасса хIаллай дулланмургу дачIияра бутIрайх: хьхьичI-хьхьичIмур дуллай, шаттирал хъирив ша ласлай, зунмавагу хIисав къахьунтIиссар даву дурну тийннай дирхьусса.
* * *
Жунма кIулли даву цурда дуваннияр дуллай байбишин захIматшиву. Мунияту, зущалла зура икьрал дурну, зулва зува гъираравун бивчуну, дайгу-дирхьуну, бакIуйн дуккан дувара.
* * *
КьатIув ци гьава бунугу, ци тагьар дунугу, зулла дакI зура дурну, зулва бакIравусса пикрирдавугу, ичIурагу марцIшиву, низам дувара.
