Ххуллу наниналли битайсса, ххуллурду буллалиманал – хьхьичIва-хьхьичI. Ххуллурду буллалисса, бакьин буллалисса минахуртурал пиша – агьалинан ца яла бусравминнул ххуттайсса хъанай бур. Ххуллу бакъахьурча, жущава ша бизанмагу къашайну тIий.

Жула билаятрай Ххуллурдал хозяйствалул зузалтрал кьини, байран хIисаврай, кIицI лагай 1996-ку шиная шиннай – октябрь зурул шамилчинмур бигьалагай кьини. Профессионал байран барча дуванну на хьунабавкьура Дагъусттаннал Транспортрал ва ххуллурдал хозяйствалул министерствалий паччахIлугърал закупкардалсса буллалисса отделданул хъунама, Дагъусттаннал лайкь хьсса строитель Зиябу­ттин ХIажимирзаевлущал. Гьарца ххуллуву дакIнил бутIа кьабитайманащал.

ГьунчIукьатIрал шяравату­сса Зиябуттин республикалийгу, кьатIувгу машгьурну ур дунияллийсса чIявусса зунттурдал бакIурдийн, лахъазаннайн лавхъсса альпинист хIисаврайгу. Ва гьаз хьуну ур Кьиблалул Аме­риканавусса Аконкагуалийнгу, Африканавусса Килиманджаролийнгу, ряххийлахъул гьаз хьуну ур Эльбрусрайнгу. Гьаннай­сса, республикалул ххуллурда­сса буллалаврицIун, мажал бириярча, савсъсса багьадурахъаща бакъа битан къашайсса ххуллийн уккаймагу ур. Бусан аьркинни ва жяматийсса ишир­ттавухгу чялишну гьуртту шай­сса чув ушиву, ккалли дуван­сса чIири-хъунсса мероприятие лях гьан къаритайшиву, иширайнусса кумаграйну миллатрал кьинилучIагу ушиву. ХIакьинусса жул гьанумур ихтилатрив ванал даврицIунни бавхIусса. Байран кьинирдайвагу барчаллагь учинмагу бучIирхха, республикалий ххуйсса ххуллурдал, асфальт бавкьусса ххуллурдал аьдад хъун дуллай, хIарачатрай зузисса инсантурахь.

– Зиябуттин, цукун агьра ина ххуллурдал даврийн, бикIайвав хиял ххуллурдал пишакар хьунна тIисса?
– На школа къуртал бувну махъ Москавлив 67-мур техникалул училище къуртал бувссия, 1991-ку шинал Москавуллал автомобильно- дорожный институт къуртал бувссия, гьамин, ххуллурдал инженер-строительнал минахур хьуссияв, ттула пишалий зунгу айивхьура. 1998-ку шинал зун увкIссара «Дагавтодорданийн», вана утти 25 шин хъанай дур ва даврий зий. ЛичIину хасну ва даву язи дугьанна тIисса мурад ба­къассия. Заннал гьарма ххишалану учIи хьунсса кIанттайн тIайла ацIан увайхьунссар, нагу мукун ттула кIанайн тIайла ацIан увхьунссара.
– Машинартту чIяву хьуну бур, хъанайгу бур, ххуллурдайнгу гуж багьлай бур. Ва кIану хIисавравун лавсун дуллалисса даву цукунссар?
– Чара бакъа хIисавравун ласласиссар гуж багьлай бушиву ххуллурдайн. Учиннуча, ххуллурдайх дакьайсса материл ххуй дуллалиссар, ганз дуллалиссар, материал дакьаврил техникалухгу къулагъас дуллалиссар.

— Ххуйсса даражалийсса техника дуссарив «Дагавтодорданул»?
-Къаоьккиссар техника. Гьарца райондалул ххуллурдалсса буллалисса идарарттал дуссар чара бакъа аьркинсса техника.
– Лаккуйнсса ххуллурду ххуйсса бушиву ттунгу ххал шай, лагара Лаккуйн. ДакI дарцIуну бура Лаккуй ххуйсса ххуллурду бушивруву вилмур бутIагу бушиврий.
– Му ттуннияр хъинну ттул даврия хавар буминнан кIулхьунссар. Амма буттал кIану мудангу хьхьичIунссар, ттущава буван шайсса хъинбала ттулва миллатран бикIувча тIисса тарапгу мудан дуссар. Лаккуй­сса ххуллурдал иш буниялттунгу оьккину бакъассар. Щарату ЧIяв бияннинсса ххуллу кIира шинал хьхьичIва асфальт бувтIуну бакьин бувссар. Ккулувсса ххуллугу цIу буккан буллай буссар. Гъумучату Шахьував нанисса 5 километралул манзилданийсса ххуллу хIадурну буссар, 5 километралул манзилданийсса ххуллу ноябрь зурул ахирданийннин бакьин бувансса ниятрай зий буссар, аьмну 10 километра хъанахъиссар. Мукунма ЦIахъарав бияннин цIу буккан бансса пикри буссар кIира шинал дянив. ШавкIрату Ххюлу­смав бияннинсса ххуллу, гъявгъа, щама бивчуну, бакьин бувну бу­ссар, утти Ххюлусмату Буршайн бияннинсса ххуллухагу зий буссару. Бакьин бувну, ххуйсса даражалийн буцинтIиссар. Махъсса шиннардий, асфальтгу бувтIуну, бакьин бувссар ГьунчIукьатIувсса ва Кьукнивсса ххуллурду. Асфальт къабакьирчангу, хъинну ххуйну гьартагу бувну, бакьин бувссар Инишавсса ххуллу. ЦIана бакьин буллай буссар БахIикIлавнсса ва Шахьувавнсса ххуллурду. Мува куццуй, Ккуллал райондалий буллай буссар цаппара ламурду.
– КIия-шама туристнал зунттавунсса ххуллурду ххуйсса бур МахIач­къалалив­миннуяр тIисса аьй дунни…

МахIачкъалаллал ххуллурдал иш шагьрулул администрациялийнни багьайсса. Федерал ххуллурдугу жуйн къабагьайссар. Жулмур даву республикалул лагрулийсса ххуллурдугур, кIанттулмигур. Миннул жаваб дулун жу мудангу хIадурссару.

– Зиябуттин, ттун дакIний бур оьрчI заманнай ла-ялавай нанийни, чара бакъа хьунабакьайва ххуллурду бакьин буллалисса инсантал, чIатIращал заназисса. ХIатта жу, дуклаки душругума, лагайссияв ххуллурду бакьин буван хъуниминнащал. ЦIанакул мукунсса ххуллурдал къаралчитал, ялувбацIулт итталун къабагьай.
– ХьхьичI каруннил дуваймур утти техникалул кумаграйну дуллайну тIий. Гьарцагу райондалий буссар мукун зузисса инсантал. Миннал цалчинмур бурж – бусса ххуллу ябавур. Яла, иш-тагьарданух бурувгун, аьркинмур дузал дувавур – ххуллурдацIухсса лишаннайх краска дуккаву, разметка. Учиннуча, ххуллурдал тагьарданул мониторинг. Мюрщи-хъунисса ханнакьру дарщуну, кьа дуллалиссар, кIинтнивун буккан хIадур хъанахъиссар.

– КIинттулнин ххуллурду хIадур буллай бикIу, цайми журалул давуртту дуллай бикIу, цукунсса захIматшивуртту дур зул давриву?
– Октябрь-ноябрь зурдардий кIинттулнинсса хIадуршинна дуллан бикIайссар ххуллурдал пишакартал. КIинттул авара къахъананшиврул. Хъунисса марххалтту бувни, ми букьансса, ччехдикIру къахьунсса, ххуллурдайх микI бакьирча, дичинсса материал хIадурну дикIан аьркинссар. ЗахIматшивурттуми гьар кIанттай куннасса дур, хасну жучIара вайри куну личIину ккаккан дуван­сса дакъар, так тIабиаьтрацIун, гьавалуцIун дархIусса дакъа­сса. ЖучIава гьава ччяни баххана шай, хIакьину гъилишиву духьурча, гьунттий цакуну марххала лув бишай. Ххуллурдаха зузиминнал вай кIанттурдугу хIисавравун ласайссар. Хъунисса марххалтту, замгьар, микI, буранну, чявхъа- гъараллу дусса ппурттуву ххуллурдал пишакартал хьхьу-кьини дакъа зун бикIайссар.

– Ххуллурдал даву – так чиваркIуннал даву дусса кунмасса иш бур. Хъамигу бурив зул коллективраву?
– Ххуллурдай зий бакъахьурчагу, хъамигу зий буссар ххуллурдал проектирдаха, сметарду дуллай, бухгалтериялий, кадрардал отделданий. На институтраву дуклакисса чIумал группалуву бачIи душру бия дуклай. Ххуллурдал даврия архну бакъассар хъами, хъар дургьуну зий буссар.

– Зиябуттин, ци чIа учинна, инава кунма, гьарцагу ххуллуву дакIнил бутIа кьабитлатисса пишалул уртакьтуран?
– ЦIуллушиву, барачатшиву, дуллалимуницIун кабакьиннав, буллалисса ххуллурдая агьали рязину личIаннав!
– Барчаллагь, Зиябуттин! Жугу барчаллагьрай барча буллай буру зу, бакъа чара бакъасса, бусравсса пишакартал!