Аллагьнал махъа-махъма Идавс – МухIаммад ХIабибуллагь (с.аь.с.) увсса ва мубараксса Рабиуль-авваль зуруй, октябрь зурул 15-нний, лакрал агьали бавтIунни Редукторный посёлокрай цIуну буллалисса МухIаммад Идавсил (с.аь.с.) цIанийсса мизитравун мавлуд дуван. БавтIунни мюнпатсса, агьамсса ихтилатирттахгу, илкинсса майданнив личIинува ххуйну экьинанисса нашидирттахгу вичIидишин.
Мавлудрай ихтилатру бунни Лакрал райондалул бакIчи Юсуп МахIаммадовлул, Лакрал райондалул Имамтурал советрал хъунама МухIаммад Ссаламовлул, Гъази-Гъумучиял мизитрал имам Ансар Сулаймановлул, Ккуллал райондалул Имамтурал советрал хъунама МухIаммад-Маннар Бариевлул, ЦIуссалакрал райондалул Имамтурал советрал хъунама Мансур Хаваевлул. Мавлуд дачин дурну ия МухIаммад Майранов. Ихтилатру буллалиминнал кIицI лавгунни исламрал ххуллу-ххагу цIакьну бурувччуну, жагьилсса никирал ва оьрчIал тарбиялухгу дагьайкунсса къулагъас дикIан аьркиншиву хъуниминнал, жулва ппухъруннал рувхIанийсса ирс-ххазина буруччин аьркиншиву.
Дия мавлудрай оьрчIру ххари бувансса викторинардугу, хъуниминнава ххув хьунан чIивимур хIаж бувансса бахшишгу, цаймигу бахшишру хIисаврайсса яргсса ишругу бия.
– Жул ва даву ххуйсса даражалий дувансса ниятгу дуссия, дугу-дуварду. Ваниха зузисса Сакиншиндарал комитет бавтIун, дан-дитанмунил маслихIат ккавкссия. Ялун букIлакIими кьамул буллай, щябитлай чялишну волонтертал зий бивкIунни. Дарщусса кьини духьурчагу, чIявусса инсантал бавтIунни, вайксса чIявусса агьали батIаврийнугу чIалачIиссар жула цашиврул лишан, – увкунни Мансур Хаваевлул.
– ДакI дарцIуну буру вай укунсса мавлудру кумагну хъанахъишиврий диннал ва миллатирттал дянив аслахIшиву, рязишиву цIакь шаврин, жулва жяматраву кувннал кувннащалсса арарду ххуй шаврин. Муфтиятрал ва лакрал активистътурал хIарачатрайну лахъсса даражалий дурсса ва мероприятиягу лакрал кувннал кувннахсса ччаву хъиннура цIакь дувансса хьуннав. Аллагьнал жула дакIурдивун Идавсихсса (с.аь.с.) ччаву дутIиннав, Мунал(с.аь.с.) ккаккан бувсса ххуллийх бачин каши дулуннав, ва, яла-яла, дунияллийн паракьатшиву дагьаннав, Украиннаву нацизм ххит дуван лавгсса чиваркI ххувшаврищал цIуллуну шаппай зана хьуннав! – тIий, дуаь дуллай бия мавлудрайн Буйнакскалия бувкIсса 1-мур ЦIувкIратусса Рукьижат Мусаева.
– Бюххансса, бавтIцириннан асар хьунсса ихтилатру бия лакрал имамтурал, жяматийсса ишккаккултрал, динчитурал, дакIру хIайран дансса чIуний ккалай бия МухIаммад Идавс (с.аь.с.) хъун уллалисса, мунал оьрмулия бусласисса мавлуд. ЧIявусса мюрщисса оьрчIру бия, кьатIувсса дякъия нигьа къабувсун бувкIсса бугьарасса агьлугу бия. Лагма-ялтту лакку мазрайсса ихтилатру баллай, дакIниву хъуннасса ххаришиву дия. Ва мавлудрал барачат залданувун бавтIсса цинявннал къатравун бухханнав. Жулва миллатрал гьарца дайсса даврий барачат бишиннав! Ва барачатсса мавлуд Аллагьнал кьамул даннав! – тIий бия философиялул элмурдал доктор Асият Буттаева.
