Цалла хIисав ларсъсса инсантал тIун бикIай: «ХхюцIалла шинава ливчуну махъ мина даххана дан къабучIиссар», – тIий.
МарцIсса гьава бусса зунттал кIаная къагьанна тIий, гьаксса аглан хъанай ивкIра. ЗахIматсса цIуцIаву дусса кулпатращал МахIачкъалалийн изан багьунни ттунгу ЧIурттащату. Зунмагу хIисав шайхьунссар шагьрулул халкьуннал оьрму бигьа­сса бушиву. ЧIявусса халкь бусса кIанттурдай тIурча чIявур къашайшалт, гьавалувухчIин ччя-ччяни лахъай азарду. МахIачкъала бусса кIанугу жула, зунттал инсантурал, оьтту-ттурчIацIун бавкьу­сса кIану бакъар. Мукун хъанай бур ттул шагьрулийсса оьрмулувугу. Угьара хьуну, шинай кIийла-шамийла азарханалий уттуишин багьай ттун. Учин ччимургу вари: чун агьарчагу, вичIи кIюла дурну, лак ххал буллан икIара.
Редукторный поселокрайсса шагьрулул 1-мур азарханалийн увкIсса кьини, врач-терапевт ла­кку инсан бушиву бувсунни палаталувуминнал. Ва бур ШавкIратусса Багъдаева Гюльнара Апаннинал душ, ларайсса категориялул хIакин .
Гюльнарал, гьарца къашайшалал азарданух бурувгун, чичай дарув, гьар кьини палатардавух буккай, цIимилий буругай къашайшалтрах. Мяйжаннугу, цIанасса хъин баврил методика, хьхьичIссаннух бурувгун, хъинну ххуй хьуну дур. Гюльнарал буллалисса чIявуми дарурттугу буллай бур капельницарттавух. Цуксса захIматсса къашайшала учIарчагу, кIира нюжмардул дянив ччаннай ацIан увай.
Гюльнарал иминсса ихтилатрал, янусса буругаврил, тIай­лану дирхьусса диагнозрал къашайшала ччяни хъин хьун­сса кабакьу буллай бур.
ХIурмат бусса Гюльнарай, хъинмур ва ххуймур бакъа къахьуннав вил оьрмулувугу, давривугу, ичIувагу.