ДР-лул Национал политикалул ва диннал иширттал министерствалул сакиншиндарайну, цIанасса чIумал жулла республикалий най дур «Народов много – страна одна» тIисса цIанилусса конкурс. Уттинин хьуссар конкурсрал муниципалитетиртталми ва зонардалми этапру. Ва конкурсрал «Ватандалухасса назмурду Аьрасатнал миллатирттал мазурдий» тIисса номинациялий Лакрал райондалий муниципал этапрай цалчинсса кIану бувгьуну, Ахъушав Культуралул къатлуву октябрьданул 18-нний хьусса зоналулмур этапрайгу цалчинсса кIану бувгьунни КIундиннал дянивмур даражалул школалул 10-мур классрал дуклаки душ Илада Ибрагьимовал.
Октябрьданул 24-нний Илада цаймигу финалистътуравух гьуртту хьунтIиссар МахIачкъалалив М. Горькийл цIанийсса Оьруснал театрдануву хьунтIисса конкурсрал финалданий. ДакI дарцIуну буру Иладал шиккугу лайкьсса гьурттушинна дувантIишиврий.
Конкурсрай буккин Иладал язи бувгьуну бур Зияуттин Айдамировлул «Буттахъал мина» тIисса шеъри.
– Ва шеърилул ттуйн хъунмасса асар биян бувна. Мяйжаннугу, инсан цува лявхъусса миналияр ххуйсса кIану чуври бикIан бюхъайсса? Дунияллул ци мурцIнийн иярчангу, ватандалийн зана хъанай ур инсан, ванияр ххуйсса кIану бакъашиврийгу цал ххишалагу мукIру хьуну.
[dropcap]Ч[/dropcap]увнияргу, буттал кIанайрихха уртту щюллисса, булбулданул балайгу марцIсса. Шикку бюхттулсса зунттурду буссар паракьатшиврул ва марцIшиврул къаралданий бавцIуну. Конкурсрая тIурчаннив, шикку сахIналийн увксса гьарцамагу ия гьунар бусса. Конкурсрал биян бувсса асарду цукссагу хIаллай къалихханссар. Зоналулмур этапрай гьарца райондалул ккаккан дуруна цалла аьдатру, багьу-бизу. «Национальные подворья народов России» номинациялий Лакрал ва Ахъушиял районну хьхьичIун дурккуна, – буслай бур Илада.
Ва дуклай бур марцIсса ххювардай. Агьаммур дуккаврищал архIал занай бур къавтIаврил кружокрайн, мукунма «Информатикалул дуниял» тIисса ва шахматиртталмур кружокирттайнгу. ХьхьичIунну гьуртту хъанай бур школалул жяматийсса ва культуралул оьрмулувухгу. Байбихьулул классирттава байбивхьуну, уттинин Илада цимигу конкурсрай гьуртту хьуссар, бувгьуссар цалчинсса кIанттурду.
Райондалулмур ва зоналулмур этапирттай бувгьусса цалчинсса кIанттурдугу барча тIий, чIа тIий буру Иладан финалданийгу тIайлабацIу.
