Творчествалул ххуллийсса наградартту

Хизри Илиясов ххув хьунни «Аспи» тIисса («Ассоциация
Союза писателей и издателей России») литературалул
личIи-личIисса жанрардал конкурсрай.


Шаэр, чичу, журналист, филологиялул элмурдал доктор Хизри Илиясов ххуйну кIулссар Дагъусттаннай.
ХьхьичIун къаххяхлахисса уну, цаппарассаннан ванал дуллалисса циняв давурттая кIулнугума къабикIай. Ва ур творчествалул, педагогикалул, элмулул давурттаха ва жяматийсса иширттаха зузисса инсан. Вай гьарицагу ххуллий ванал лайкь дурну дур личIи-личIисса наградартту: хIурматрал грамотартту, барчаллагьрал чагъарду, медаллу. Вайннувух бур имам Шамиллул фондрал ва Дакьаврил фондрал филиалданул мусил цIуртти.

Хизри Илиясовлул итабавкьуну бур «Жамжигьаннал кIичIу», «Чулахъ Сурхай-хан», «Лакку улклул ххуллурдай», «ЧIурдал дара», «Ккавкказ миллатрал лажинтру» ва цаймигу биялсса луттирду. Хизрил гьунар чIалан бикIай Аьра­сатнал даражалий­сса личIи-личIисса конкурсирттайгу. Уттигъанну ва ххув хьунни «Аспи» тIисса («Ассоциация Союза писателей и издателей России») литературалул личIи-личIисса жанрардал конкурсрай.

Ассоциациялул каялувчи ур машгьурсса чичу, журналист, Аьра­сатнал ПаччахIлугърал Думалул депутат Сергей Шаргунов.
– ДакIний, мазрай бакъана хьунни ва конкурсрай гьуртту шаву. Интернетраву баян баву ккарккун, ай, балики, куну, ца критикалул статья гьан бувссия. Проектрал мурад бия жула чичултрал творчествалул потенциал ялун личин баву, гьунар буми ашкара баву ва миннан творчествалун­сса шартIру дузал даву. Муниятур проектран цIагу «Литературная резиденция». На гьан дурссия «Восточная символика новейшей русской литературы» тIисса даву. Машгьурсса шаэртал Константин Кедровлул, Александр Еременкол, Алексей Парщиковлул, Геннадий Айгил ва цайминнал творчествалия чивчуссия. Ххал бивгьуссия Александр Илическийл «Перс» тIисса роман, – буслай ур Хизри. Ва ххув хьуну ур литературалул критикалул жанралуву.
Проектраву ххув хьуминнан бувну бур Ессентукилийн, Железноводскалийн, Кисловодскалийн ва цаймигу Ккавкказуллал минерал щинал шагьрурдайнсса экскурсиярду. Вай бивну бур тарихравун багьсса кIанттурдайн – М.Ю. Лермонтовлул дуэль хьу­сса ва му цалчин увччуну ивкIсса кIанттурдайн, Апанни Къапиевлул гьаттайн. Вай хьунабавкьуну бур ва ихтилатру бувну бур личIи-личIисса аудиториярттал хьхьичI.


Увну ур Хизри 1960-ку шинал Ппалассуннал шяраву Илияслул кулпатраву. 1978-ку шинал къуртал бувну бур Бабаюртуллал райондалийсса КIамахъаллал дянивмур даражалул школа.
1982-ку шинал къуртал бувну бур Дагъусттаннал университетрал коммерциялул факультет. 1987-ку шинал – А.М. Горькийл цIанийсса Литературалул институт, миккува аспирантурагу. ЦIана ва ур «ЦIубарз» журналданул редакторнугу зий ва Дагъусттаннал педагогикалул университетраву дарсругу дихьлай.


– ДакIний личIансса хьунни композитор А.А. Алябьевлул къатлувусса, М.Ю. Лермонтовлул къатта-музейравусса, А.С. Пушкиннул цIанийсса Ккавкказуллал Зунттал литературалул обществалувусса, Пятигорскаллал ПаччахIлугърал университетравусса хьунабакьавуртту. Хаснура дакIний ливчIунни Алябьевлул къатлувусса хьунабакьаву. Ттухь тавакъю бунни ттула ниттил мазрай шеъри буккин. Шеъригу бувккуну, на цIуххав: «Ина лаккучу урав?».
– «Акъара, лакку маз цукун­сса бурив баян ччай бия», – увкунни.
Мукунна дакIний личIансса хьунни филологиялул элмурдал доктор, профессор, А.М. Горькийл цIанийсса Литературалул институтрал ректор Алексей Варламовлущалсса хьунабакьаву, – буслай ур та аьрххилиясса асардая Хизри.
Шиккува бусан, Хизри хъанахъиссар Пятигорскаллал Па­ччахIлугърал университетрал щурущи дурсса Ухссавнил Ккавкказуллал халкьуннал мазурдийсса антологияртту итабакьаврил проектрал гьурттучи.

Университетрал препода­вательтурал ва студентътурал хьхьичI бувсса цала ихтилатраву Хизрил гьаз бувну бур, литературалуцIун ва творчествалул процессрацIун бавхIусса бакъассагу, мюрщи миллатир­ттал масъаларттугу. «Литературная резиденция» проект дакъа­ссагу, тай гьантрай Пятигорскалий най диркIун дур «Аспилул» сакин дурсса «Совещание молодых писателей Южного Федерального округа» тIисса цамургу проект. Ва проектрал даву тIитIаврийн Оперетталул театрданувун вайннайнгу оьвкуну бур.

– КIирагу проектрал агьаммур мурад бия литература машгьур даву, дакьаврил, аслахIшиврул пикрирду хьхьичIун ласаву. Укунсса проектру чара бакъа аьркин­ссар инсантал кувннащал кув кIул бан, гъан бан, опыт кIибачIин. ХIакьину, жула билаятрайсса тагьар бигьа дакъасса чIумал, творчествалул интеллигенция цачIун баву, лагма лаган баву, халкьуннал дакI даву, ватандалухсса ччаврил гьавас бутаву мурадрай Сергей Шаргуновлул багьа бищун къашайсса даву дуллай ур, – тIий, барчаллагьрай буслай ур Хизри.

Р.S. Ва макьала къуртал дуллалисса чIумал, бавунни Хизри цамургу конкурсрай ххув хьушиву. Ва хьуну ур 2021-ку шинал Аьра­сатнаву баян бувсса «Яла ххуймур элмийсса лу» конкурсрал лауреатгу. Жюрилул лавай­сса кьимат бивщуну бур «Литературный камертон (ментальные и художественные особенности национальных литератур)» тIисса ванал луттиран.
Барча тIий буру Хизрихь литературалул ва элмулул ххуллийсса наградартту. ЧIа тIий буру творчествалул ххуллий так хьхьичIуннайшивуртту ва тIайлабацIуртту.