Октябрь зурул 7-нний Лакрал театрданул тIиртIунни 87-мур театрал сезон.
Гьашинусса тIитIаву ттигъанну жуятува лавгсса Сибирбаг Кьасумовлул аьпалун хас дуллай бушивугу баян бувну, ккаккан бунни драматургнал «Ччаву ва макь» тIисса пьесалийну бивхьусса спектакль.
ДакIнийн бутанну, дузрайн къадурксса Гъумучиял ПатIиматлул ва Бархъаллал Маллайл эшкьи-ччавриясса спектакльданул премьера хьуссия 2007-ку шинал. 2013-ку шинал цIу буккан бувну, тания шийнмай хьхьичIунсса ххуттай бур театрданул репертуардануву.
КIицI къабувну къабучIину бухьунссар Дагъусттаннал лайкь хьусса артистка Зинаида Чавтараева Гъумучиял ПатIиматлул рольданухлу лайкь хьуну бивкIшивугу ларайсса премиялун. Пьеса чивчуну бур XIX-мур ттуршукулий лакрал шаэр Гъумучиял ПатIиматлул ва Бархъаллал Маллайл цанначIан цаннал ччаврил мазрай чичлай бивкIсса шеърирду гьануну лавсун. Вай шеърирду цивппагу, XIX-мур ттуршукулул шеърилугърал ирс хIисаврай, багьну бур Дагъусттаннал халкьуннал шеърирдал антологиялувун.
Спектакльданул режиссер-постановщикну ур Аслан МахIаммадов, художник – Аскар Аскаров. Роллу дургьуну бия: Луиза Шагьдилова, Юлиана МахIаммадова, Шамсуттин Къапланов, Саният Рамазанова, Ларина Оьмарова, ХIажиаьли ХIажиаьлиев, Адам ХIайдаев, Барина Мусаева.
Спектакль къуртал шайхту, Сибирбаглул душ Нину Кьасумовал, артистътуран тIутIивгу пишкаш дурну, барчаллагь увкунни театрданул каялувчи Бадрижат МахIаммадхIажиевахь, хъунама режиссер Аслан МахIаммадовлухь ва цинявппагу актертурахь, буттал аьпа хIурматрай буручлай бушиврухлу.
