Шагьрулий хъунма хьунугу, шяраваллилмур ххирану

Махъ лирчIунни гьарца шинал шайсса Щалагу Аьрасатнал агропромышленностьрал «Мусил ссут» тIисса выставка. Ваний, муданна кунна, хьхьичIунсса гьурттушинна дунни жулла республикалулгу.
ДР-лул ХIукуматрал председательнал хъиривчу Нариман АьбдулмутIалибов бакIчисса республикалул делегациялуву Подмосковьелий хьусса выставкалий гьуртту хьуссар жулва лакку душ ХIажиева ХIабибатгу. ДР-лул Шяраваллил хозяйствалул министерствалий зузисса ХIабибатлул цимигу шинни ва выставкалийнсса хIадуршиндаралсса буллай. Жулла республикалул шикку ва ххуллухгу 23 медаль (вайннува 16 – мусилсса) ласавриву ванилмур захIматрал бутIагу буссар.

ХIабибат бур ДР-лул Шяраваллил хозяйствалул ва машлул министерствалул отделданул начальник, ванийн дагьлай дур выставкарттайн ва ярмаркарттайн хIадур шаврицIун дархIусса жаваблувсса даву.
– Аьрасатнал Шяраваллил хозяйствалул министерствалул дуллалисса «Мусил ссут» выставка гьашинумур 24-сса хъанахъиссар. Ва хъанахъиссар шинал мутталий шайсса аграр шадлугъирттаву яла хъуннамур, яла агьаммур. Выставкалий гьуртту шай регионнал властирдал, хьхьичIунсса агрокомпаниярттал вакилтал, экспертътал, аьлимтал ва чIявусса цаймигу пишакартал. Жул министерствалул мудангу хIарачат бувайссар республика ва выставкалий лайкьну ккаккан дан. Шикку республикалул перерабатывающий промышленностьрал предприятиярттал ва шяраваллил хозяйствалул дуки-хIачIия дуккан давриха зузисса 20-хъайсса идарарттал ккаккан дунни цалла хьхьичIуннайшивуртту, цалла каширду, бюхъу. Дагъусттан Республикалул экспозиция щаллу бувну буссия миллатрал зумуну. Выставкалийн бувкIми хъунмасса гъирарай ххал буллай бия ва, – буслай бур ХIабибат.
ХIабибат шяраваллил хо­зяйствалуцIун дархIусса даврийн багьаву хар-хавар бакъасса ишну къахъанахъиссар. Ва бувну бур Вирттащиял шяравасса ЛухIуев Шарабуттиннул ва Гъумучату­сса Сурхайханова Халумлул кулпатраву. Шарабуттиннул ппу Башир, Сталинградрахлусса талатаврил гьурттучи, 30-ллихъайсса шиннардий зий ивкIссар Гъумучиял колхозрал хъунама бухгалтерну. ХIабибат, учин бучIир, цила буттал, аьпа биву, Шарабуттиннул язи бувгьумур ххуллийх лавгссар куну. ЧIявучин кIулсса ЛухIуев Шарабуттин зий ивкIссар га чIумал Шяраваллил хозяйствалул министерствалучIа бивкIсса дахху-ласулулсса буллалисса Департаментрал («по регулированию продовольственных рынков») начальникнал хъиривчуну. ХIабибатлул нину Халум бур га чIумул сайки цинявннан кIулсса учитель, фронтовик, Брестскаллал къала буручлачиминнавух ивкIсса, аьпа биву, Аслан Сурхайхановлул душ, ванил цикссагу шиннур МахIачкъалалив хIакин-стоматологну зий. Шарабуттиннул ва Халумлул дянив хьуну бур 3 душ. ХIабибат дянивмур бур. Ванил цила буттал ва буттал буттал ххуллурду язи бугьарча, хъунмунил ва чIанма-чIивимунил медициналул дуккаврилми идарартту къуртал бувну бур, чIивимур душ, нину кунма, стоматологну зий бур.
ХIабибатлул марцIсса ххювардай къуртал бувну бур МахIачкъала шагьрулул 26-мур школа, 2007-ку шинал тIурча – ЯтIул дипломрай Дагъусттаннал паччахIлугърал Жамбулатовлул цIанийсса аграрный университет.
Ларайсса кIулшиву ларсун махъ ХIабибат цаппарасса хIаллай цилва пишалий зий бивкIун бур «Караван» цIанилусса супермаркетирттал сетьраву, яла шинну дурну дур Шяраваллил хозяйствалул министерствалучIасса Департаментрай зий. Министерст­валий ХIабибат зий бур 2013-ку шиная шийнмай, 2019-ку шиная шийнмайрив – Министерствалул «агропродовольственный рынокирттал ва экспортрал потенциалданул» отделданул начальникну. Ванийн, выставкарттал сакиншиннаралми бакъасса, ялагу багьлай бур МахIачкъалалив шайсса республикартталми ва муниципалитетирттай шайсса районналми ярмаркарттацIун бавхIусса ма­съалартту.
Шагьрулий бувсса, хъунма хьусса жагьилсса душнил шяраваллил хозяйствалуцIун бавхIусса ххуллу язи бугьаврия цIувххукун, ХIабибатлул бувсунни цинна кIул­ши хьуния шийнмай бу­ттал шяраваллил хозяйствалуцIун бавхIуну чIявусса зат­ру буслай ивкIшиву, инсаннал цалла карунних ххяххан дурмунихсса, хьун дурмунихсса ччаву буттал цивура чIивинийра дирхьушиву ва хасну ва ххуллийн бу­ккаврия цуппа ца тачIавгу пашман къавхьушиву.
ХIабибатлуя циява жу цалчин чичлай бухьурчагу, ванил ласная, ачIи Лахъириятусса, ачIи Хъунатусса Руслан ХIажиевлуя – Тарихрал, культуралул ва архитектуралул гьайкаллу дуруччаврил Республикалул центрданул директорная, ванал дуллалисса даврия чивчуссар цимилгу. Русланнул ва ХIабибатлул дянив бур арс ва душ.
ЦIанасса чIумал ХIабибат зий бур октябрьданул 29-нний Ма­хIачкъалалив Пушкиннул цIанийсса кIичIираву хьунтIисса шяраваллил хозяйствалул Республикалул ярмаркалуцIун дархIусса давурттаха. Ва выставка дуллалиссар агьалинал чулухасса чIявусса тавакъюрдайн бувну.