ДР-лул Халкьуннал Мажлисрал депутат Артур Исрапилов ва ЦIуссалакрал райондалул бакIчи МахIаммад-ХIажи Айдиев бивунни Хасавюрт шагьрулул, Хасавюртуллал ва ЦIуссалакрал районнал аьралий комиссариатрайн. Вай хьунабавкьунни аьралий комиссар Абакар Давудовлущал.
Хьунабакьаврил мурад бия райондалийсса резервистурал сияхIру ххал дигьаву ва мобилизациялул хIакъиравусса бувчIинбавуртту даву.
КIицI лаган, военкоматирттая цалчин дуркIсса сияхIирттаву диркIун дур аьпалул хьусса инсантурал ва аьралий операциялуву гьуртту хъанахъисса контрактниктурал цIарду.
Ихтилат хьунни, личIи-личIисса багьана-сававрттайн бувну, республикалул кьатIув лавгсса, чув буссарив кIул бан къахъанахъисса инсантурал хIакъиравугу. Ми инсантуралсса ттиния тихунмай ихтиярду дуруччай органнал буллантIиссар. ХIакьинусса кьини райондалий хIадурну дур резервистурал сияхIру, минная цаппара группарду мобилизоват бувну, хIадур бан тIайла бувккун бур. Шяраваллаву инсантуран бувчIинбавуртту дуллай бур, мобилизациялия махъун бутан багьлагьисса инсантал бувцусса ишру къахьуншиврул.
