Октябрь зурул 5-нний Аьрасатнаву кIицI лагайссар Учительнал кьини. Ва кьини щалагу
билаятрай лахъа-хъун бай оьрчIан кIулшивуртту дулаврил ххуллий захIмат бихьлахьими.
Учительнал пиша бур ца яла захIматмур ва жаваблувмур. Учительнал дуллусса тарбиялийн ва кIулшивурттайн хъар хъанай бур жула бучIантIимур, цанчирча гьарицагу сфералуву зий, захIмат бихьлахьисса инсантурал кIулшивурттал гьану бизлай бур школалий.
ХIакьину, учительнал пишалул байрандалуцIун бавхIуну, ттун бусан ччива цIанихсса ЧIяйннал школалий каялувшиву дуллалисса ххаллилсса учитель ва директор, ХIажинал душ Альбина ХIаммакуевая.
Бувну бур Альбина ЧIяйннал шяраву чIявусса оьрчIру бусса кулпатраву.
1995-ку шинал мусил медальданий ЧIяйннал школагу къуртал бувну, бувххун бур Дагъусттаннал университетрал физикалул факультетрайн. Яла, юристнал пиша ххуй бизлазисса душ, физикалул факультетгу кьабивтун, бувххун бур юридий факультетрайн.
2001-ку шинал бувкIун бур цила къуртал бувсса школалий зун. Дихьлан бивкIун бур правоведениялул дарсру. Му ппурттуву ЧIяйннал школалий аьркинну ивкIун ур математикалул учитель. Учительнал даврихух лавгсса Альбинагу, математикалул дарсру дихьлансса мурадрай, Дагъусттаннал педуниверситетрал математикалул факультетрайн бувххун бур. Дуккаврил бюхъу бусса Альбинан му къуртал бангу захIмат къавхьуну бур.
2011-ку шинал, ванил бюхъу-бажар чIалай, бивтун бур шяравусса детсадрал хъунмурну. Гикку зий Альбинал сайки 4 шин дурну дур. Мичча бувцуну бур Ккуллал райондалул КIулшивуртту дулаврил управлениялул хъунмурну. Ва къуллугърайгу Альбинаща ккаккан бан бювхъуну бур каялувчинал гьунар.
2018-ку шинал сентябрь зуруя шийнмай ва бур Б. Рамазановлул цIанийсса ЧIяйннал школалул директорну. ЧIирисса чIумул дянив ва школалий чIярусса дахханашивуртту ва ххуйсса ккаккияртту чIалачIи дурну дур.
ТIайлассар, чIявуми шяраваллал школардай кунма, цIана вайнначIагу оьрчIру чанну бур.
Ци чулийгу, директоргу, учительтурал коллективгу хIарачат буллай бур оьрчIан куртIсса кIулшивуртту дулун, ттизаманнул тIалавшиннардаха лавхьхьуну зий, муданнагу машгьурну диркIсса ЧIяйннал школалул цIа лайкьну дуруччин. ЦIана ЧIяйннал школалий 49 оьрчI дуклай ур. Цалчинмур классравун гьашину увагу 2 оьрчI увкIунни. 11-мур классравугу микссава бур. Гьашину школа къуртал бувсса оьрчIава 2 увххунни дуклан. Вайннаягу ххуйсса пишакартал хьунсса умуд бур.
Учительнал пиша язи бугьаврия цIухху-бусу буллалиний, Альбина буслай бур учитель хьунсса пикри къабивкIшиву, амма, ва ххуллийн бувккун махъ, пиша цинма хъинну ххира хьушиву.
– Ттул ппу ХIажи ия ккарччал хIакин, нину Басират – машлул зузала. Ва чIярусса шиннардий райпорай зий бивкIссар.
Жул кулпатраву 8 оьрчI бия (3 арс, 5 душ). Учительтал хьунни ттуягу, кIива ссиягу, – буслай бур Альбина.
Ванил цилагу, 3 ссилгу школа медаллай къуртал бувну бур.
Вайннал душру циняв ххуйну дуклакисса, личIи-личIисса гьунарду бусса, школалул жяматийсса оьрмулуву чялишсса гьурттушинна дайсса бивкIун бур. ЛичIи-личIисса дарсирдал олимпиадарттай хьхьичIунсса кIанттурду бугьайсса бивкIун бур.
ЦIанасса чIумалгу ЧIяйннал школалул учительтуралгу, дуклаки оьрчIалгу, личIи-личIисса конкурсирдай гьуртту хьуну, хьхьичIунсса кIанттурду бугьай.
Гьашину школалул лакку мазрал учительница Луиза Шалласуевал «Яла хьхьичIунма лакку мазрал учитель» конкурсрай райондалий цалчинсса кIану бувгьуну бур. «Шинал учитель» тIисса конкурсрай 3-мур кIану бувгьуну бур байбихьулул классирттал учительница Гуля Шахабуттиновал.
Мукунма хьхьичIунну бур школалул дуклаки оьрчIругу. ЧIяйннал школалий хъуннасса къулагъас дуллай бур оьрчIру Ватан ххирану тарбия баврих. Шикку чялишну зий дур «Патриоты» тIисса, 13 оьрчIая хьусса, юнармейцынал кьюкьа. Школалий мукунна зий дур 10 дуклаки оьрчIая сакин хьусса ЮИД-рал (юные инспекторы движения) кьюкьа.
Гьашину «Безопасное колесо» тIисса конкурсрай гьуртту хьуну, вайннал зоналий 2-мур кIану бувгьуну бур. Медициналул цалчинсса кумаг бан кIулшиврул чулуха кьюкьлувасса дуклаки оьрчIал бувгьуну бур 1-мур кIану. ХIасил, учительтуралгу, дуклаки оьрчIалгу хIарачатрайну школалул цIа уттигу бюхттулнура дур. Гьай-гьай, шикку хъунмасса бияла дуккаврилгу, тарбиялулгу процесс янилу бувгьусса директорналгур бусса.
ЧIяйннал школа мяйжаннугу бюхттулну, хьхьичIунну бушиву исват хьунни уттигъанну кIицI ларгсса школалул юбилейрайгу.
Барча тIий буру Альбина ХIажиевнахь ва щалагу ванил коллективрахь пишалул байран.
ЦIуллушиву дулуннав, оьрчIру тарбия баврил ва миннан кIулшивуртту дулаврил ххуллий буллалисса зул захIмат мудангу дузрайн буккаваннав.
