Октябрьданул 1-нний щаллагу дунияллий кIицI лагай Музыкалул кьини. Лакрал миллатрал махъа нанисса никираву чансса бакъар буниялану музыкалухун багьсса, итххявхсса, гьунар бусса оьрчIру, вайннавасса цагу – Каспийскаллал ОьрчIал искусствардал С. Агабабовлул цIанийсса школалийн заназисса, чIивиниява шийнмай музыкалух эшкьи хьусса МахIаммадова Написат.
Щалларагу дунияллий кIицI лагайсса Музыкалул кьини ляхъан дурссар Дмитрий Шостаковичлул – композиторнал ООН-лийн гьан бувну бур укунсса кьини кIицI лаглансса сипталущалсса чагъар. Вания махъ Музыкалул кьини кIицI лаглансса хIукму кьамул бувссар Лозанналий 1973-ку шинал, Дунияллул халкьуннал дянивсса музыкалул советрал 15-мур Генеральный ассамблеялий. Цурда Кьинирив кIицI лаглан бивкIссар кIира шинавату – яни 1975 шинал. Аьрасатнаву тIурча, ва кьини официальнайну кIицI лаглан бивкIссар 1996-ку шинал – Дмитрий Шостакович увну 90 шин хьуну махъ.
Написат бувну бур КаспийскалийКкурккуллал шяравасса Русланнул ва ГьунчIукьатIрал шяравасса Ссапижатлул кулпатраву 2007-ку шинал. ЧIун дирукун, лавгун бур шагьрулул 1-мур школалийн. Ссапижат цуппагу цила чIумал агьаммур дуккаврищал музыкалул школалийнгу занай бивкIун, вайннанний шаппа музыкалул инструмент (фортепиано) бивкIун бур. Написатгу мудан муних щябикIайсса бивкIун бур, цищава шайсса куццуй бишлай му. Хъинну ччай бивкIун бур ванин лахьхьин ва инструмент. Амма, цилвагу му ххуллу бивтун, мунил захIматшиву кIулсса, музыка му оьваннасса хобби дакъашиву, бунияласса даву душиву бувчIлачIисса Ссапижатлун ччай къабивкIун бур душ музыкалухун багьну. Написат цилвамуний бавцIуну, занан бивкIун бур Каспийскаллал С. Агабабовлул цIанийсса музыкалул школалийн. Ванин педагогнал чулухагу хъунмасса тIайлабацIу хьуну бур – ва багьну бур цилла даву ххуйну кIулсса ва ххирасса педагог Марианна НурмахIаммадовачIан.
Написатлул цалчинсса бунияласса наградарттавух бур Иветта Вороновал цIанийсса музыкалул фестивальданий оьрмулул 8 шинаву лавсъсса диплом. Вания гихунмай чIава музыкант гьуртту хьусса конкурсирттал сияхI хъинну лахъисса дур, кIицI лаганну анжагъ цаппарасса: Къизлардай хьусса «Золотая лира – 2017», Москавлив хьусса «Дети в мире старинной музыки» (2017 шин), Грозналий хьусса «Дорогу талантам» конкурс, гихунмай – Краснодар, Казань, Владикавказ, Ростов-на-Дону, цимиллагу Москавлив хьусса конкурсру.
Написат хIаласса оьрчIру 2020-ку шинал гьан аьркинссая Москавлив, бахшишрансса аьрххилий, билаятрайсса ва дунияллийсса коронавирусрал тагьар сававну, къалавгна ливчIссар.
Ва гъинттул тIурчарив, Написат лавгссар Москавлив, Дунияллул халкьуннал дянивсса ОьрчIал цалчинсса культуралул форумрай гьуртту хьун. Написатлущал лавгссар мукунма музыкалул школалийн заназисса ванилва хъинирву Роза Къушиевагу. Вагу, Написат кунма, цилва чIавасса оьрмулий уттинин къачансса хьхьичIуннайшивурттайн лавхъун бур.
Августрал 24-нния 28-ннийн бияннин най бивкIсса ОьрчIал культуралул форумрай гьуртту хьуссар Аьрасатнал сайки гьарцагу субъектраясса, мукунма дазул кьатIувсса гъанми билаятирттаяссагу, оьрмулул 12 шинава 17 шинавун бияннинсса оьрчIру – цинявппагу 1500 гьурттучи. Дагъусттан ва форумрай МахIачкъалалиясса ва Къизлардаясса цаймигу оьрчIащал лайкьну ккаккан бувссар Каспийскалийсса жулва лакку душварал – Написатлул ва Розал. Форумрал лагрулий оьрчIру гьуртту хьуссар личIи-личIисса мастер-классирттай, лекциярттай, арт-школарттал, ккуркки столлал ва форсайт-сессиярттал давурттай. Шикку яла дакIний личIанмурдив вайннан хьуссар Аьрасатнал Федерациялул культуралул министр Ольга Любимоващалсса хьунабакьавуртту.|
Ва аьрххилий цийнма яла-яла асар биян бувмуния Написат буслай бур:
– Ттун хъинну тIааьнну бия щалла республикалия ва форумрай гьуртту хьун язи бувгьусса 7 оьрчIавух навагу бушиву. Шикку хьусса личIи-личIисса хьунабакьавурттава яла-яла асар хьунни пианистка Екатерина Мечетоващалмур.
Ва мукунма рязину буслай бур форум цуппа байбишин хьхьичI ваний гьуртту хьун билаятрал личIи-личIисса кIанттурдая бувкIсса оьрчIан бувсса Москавлийхсса 3 гьантлийсса экскурсиялия, «Моя Россия» программалул лагрулий хьусса. ЛичIи-личIисса автобусирттай оьрчIру бивну бур билаятрал хъуншагьрулул язими кIанттурдайн. Дагъусттаннаясса оьрчIащал экскурсиялий ца автобусраву бивкIун бур Тюменнаясса, Иркутскалиясса, Волгоградраясса ва Свердловскалиясса оьрчIру. Вай циняв куннащал кув, кIул хьуну, дус хьуну бур. ОьрчIал культуралул форумрая бувкIун махъ Написат хIаласса оьрчIайн оьвкуссар Культуралул министерствалийн – ведомствалул бакIчинащал хьунабакьин, шагьрулул администрациялийн – мэрнащал хьунабакьин.
ЦIана Написат дуклай бур 1-мур школалий 9-мур классраву, мукунма ОьрчIал искусствалул школалийгу 9-мур классраву. ОьрчIал искусствалул школа ванил къуртал бувссар, амма Музыкалул училищалувун 9-мур класс къуртал бувну махъ бакъа буххан бюхълай бакъахьувкун, ванилгу, Розалгу пикри бувну бур ва шиналгу занан цанма ххирасса музыкалуха зун ОьрчIал искусствалул школалийн. Вайми дарсирдал экзаменну дукIура дуллуну, Написат ва Роза занай бур цалва бищайсса инструментиртталми дарсирдайн – фортепиано ва флейта.
Укун, ярг-яргсса асардащал гъинтнил каникуллугу гьан дурну, кIулшивурттахун ва музыкалухун цIусса гъирарай багьанну дайдирхьунни вай душваврал дуккаврил шин. Вайннащал архIал классраву ва музыкалул школалий дуклакисса оьрчIалгу хъунмасса гъирарай вичIи дирхьунни душваврал гъинтнил каникуллайсса аьрххирдаясса хавардах.
ЧIа учинну жулва душваран дуккавривугу, музыкалувугу, оьрмулувусса цайми-цайми иширттавугу тIайлабацIу, уку-укунсса оьрчIал гьунарду итххяххан буллансса, махъа нанисса никирая жува ххари хъанансса паракьатсса дуниял.
