Октябрьданул 26-нний МахIачкъалалив хьунни Дагъусттаннал паччахIлугърал медициналул университет сакин бувну 90 шин шаврин хасъсса, РНМОТ-лул (Российское научное медицинское общество терапевтов) сакиншиндарайнусса Элмийсса ва практикалул конференция. Шикку РНМОТ-лул яла лараймур награда – Н. И. Пироговлул орден дуллунни профессор Маммаев Сулайман Нураттиновичлун.
Цалла давриву дакI дирхьуну зузисса, кIулмуний, дурмуний гьашиву тачIаврагу къадурну, цала ялув авцIуну, цIу-цIусса кIулшивуртту ласласисса, цува цуксса давривун кьувтIуну унугу, миллатралмуния, жяматралмуния тачIавгу ят увцун къаикIайсса Сулайманнул хIалал дурссар вагу, ванияр ххиссагу наградартту. ДГМУ-лул госпитальная терапиялул 1-мур кафедралул профессор, АьФ-лул ЦIуллу-сагъшиву дуруччаврил министерствалул Ухссавнил Ккавкказуллал Федерал Округрайсса штатрай акъасса хъунама специалист-терапевт, гастроэнтеролог, РНМОТ-лул Дагъусттаннайсса отделениялул председатель, вара обществалул Президиумрал член, медициналул элмурдал доктор, профессор Сулайман Нураттиновичлун Барчаллагь ва орден дуллунни РАН-лул академик Мартынов Анатолий Ивановичлул.
Ва наградагу барча тIий, чIа тIий буру кIулминналгу, архIал зузиминналгу дянив хIурмат-бусрав бусса Сулайман Нураттиновичлун дуллалимуниву тIайлабацIуртту, гъира-шавкь, кьудрат.
