Ххирасса оьрчIрув! Зун хъамавагукъабивтрив сентябрь зурул 27-мур кьини жулва билаятрай Тарбиячинал кьини душиву? Къахъамабитайссаркьай! Туну, жува ци буван аьркинссар ва байрандалул гьантрай? ТIайлассар! Зул хорданийсса жаваб ттун бавунни. ХIатта зунттал шяраваллавусса садикирттайсса оьрчIалмур жавабгума. Жува барча буван аьркинссар жунна тарбия дуллалисса, жухава аякьалийсса садикирттал циняв коллективру: тарбиячиталгу, нянечкахъулгу, махъсса щалва персоналгу. ХIакьину Аьрасатнаву бусса бур 60 азарунниха ливчусса оьрчIал багъру. Къачаннихха! Шиная шинайн ххигу хъанай бухьувкун. Дахьва гьашинугума Дагъусттаннай цIусса биялсса садикру тIивтIунни. ЧIири-хъунсса дарсгу, «ЧIимучIалттул» аьдатрай.
Тарбиячинал кьини – жагьилсса байранни. Цалчинсса шадлугъру дурссия ва байрандалуцIун дархIуну 2003 шинал. Аьрасатнаву цалчинсса садикмур зун бивкIун бур 1863 шинал. ХIасул дурния шийнай Тарбиячинал кьини жяматийсса байран-кьини хIисаврай кIицI лагайссия. 2008 шинал КIулшиву дулаврил министерстволул байран федерал лагрулийн гьаз дурссар, 2009 шиная тIурчарив, педагогтал ва тарбиячитурал кумагчитал паччахIлугърал даражалий барча бувайссар. Барча буванну жувагу дакIнийхтуну. Нитти-буттахъал хъирив жулва тарбиялул гьану бивзми жулва тарбиячиталли. ЦIуллушиву дулуннав жулассагу, ялун нанисса никиралссагу буллан!
«ЧIимучIали»
Ккуллал оьрчIал «Баргъ» тIисса багърал чани
Ккуллал шяравусса «Баргъ» тIисса багъраву чIявуми тарбиячитал даврил мухIлу-хIин ххуйну кIулсса, оьрчIащал маз бигьану лякъайсса, опыт бусса бур. Жу цалчин бакъару вайннал коллективрайнгу, Ккуллал мюрщултрайнгу «ЧIимучIалттул» хъаттирдайн оьвтIисса. Зунттал шяраваллавусса тарбиячиталгу, мюрщултгу буттал улча ябуллалисса виртталли. Ябаннав зу Аллагьналгу! ЧIяву хьуннав лакрал шяраваллаву оьрчIал лакку мазрайсса чIурду!
ОьрчIал барча бавугу
Барчаллагь зун, барчаллагь!
Барчаллагь зун, барчаллагь,
Жул ххира тарбиячитал,
Гьар кьини жу ххари бан
ХIарачат буллалисса.
Дукан-хIачIан бувару,
Аякьалий бикIару,
Дарсругу, мяърипатгу
Зу жун лахьхьин дувару.
Жу вяйлиллай, вяйлиллай,
МютIий бакъа бунийгу,
Сси къабизай зун тачIав,
Жуйн дяъви къабувару.
Бигьалагай кьинирдай,
Багъравун къабуллуний,
Жу, ичIува бизарну,
Зу ккаккан ччай бикIару.
«Гьарца оьрчI лякьлул оьрчIаяр личIи акъассар»
Ккуллалмур «Баргъ» оьрчIал багъравунгу бивну, жу тIайланма МахIачкъалаливнмай зана бивкIсса ххай бурув? Жу ликказан дуварду Гъумуксса оьрчIал багъравугу. Ванингу цIа дур «Баргъ». «Солнышко». Ва багъраву тарбиячину зузисса Ибрагьимова ПатIимат Аьлил душнищал чIиви-хъунсса ихтилат бувансса хIалу дагьунни. Ва хьхьичIва мюрщими классирттал учительницану зий бивкIун бур. Гъумук 6 шинал хьхьичI цIусса садик тIитIайхту, шикку зун бивкIун бур. «ОьрчIащалсса даврил опыт ттулгу чIивисса бакъар, ряхра шинни ва садикрай зун бувкIун, ца кьини пашмангу къавхьура. Жул давриву яла агьаммур – оьрчIахсса ччавур. ОьрчIру къаххиранаща жучIа зунгу къашайссар, зурчагума лахъи къалагайссар. Ттун ххирар оьрчIащал зун, вайннал психология, тIул-тIабиаьт, къуццу тIутIаву. Жун, тарбиячитуран, вай жулва лякьлул оьрчIаяр личIи бакъассар. ХIарачат бувару оьрчIан хIаз бизансса кьяйдалий дарсругу лахьхьин дуван, мюнпатмунихунгу машхул буван. ОьрчIру – ххаришивур, жулла багьа бищун къашайсса хъусри, бучIантIимурди. Дунияллийцири оьрчIал оьрчIшиву тяхъасса, шадсса хьуннав тIий бура. ОьрчIру оьрчIшиву дуван битаннав! Жул байрангу, хьхьичIра-хьхьичI, вай жул оьрчIал байранни. ОьрчIру бунийри тарбиячиталгу бикIайсса».
