Сентябрьданул 27-нний Аьра­сатнаву, гьарца шинал кунна, гьашинугу кIицI ларгунни Тарбиячинал кьини – мюрщи оьрчIан цалва оьрмулул шинну, цалла дакIнил гъилишиву дуллалисса, оьрчIаву кIулшиврул ва мяърипатрал гьанурду бизлазисса, нитти-буттахъая махъ оьрчIал оьрмулуву агьамсса кIану бугьлагьисса инсантурал пишакарсса байран. Ва бусравсса пиша язи бувгьуну, цимирагу шинай оьрчIаха аякьалий, личIи-личIисса инсантурая сакин хьусса коллективраву бусраврай бур КIундиннал шяравасса, Самара шагьрулий ялапар хъанахъисса, Маммаева (Аьлибуттаева) Гьажар Асадуллагьлул душгу. Гьажар зий бур Самара шагьрулул 110-мур «Садик комбинированного вида» МБДОУ-лий.

Бувну бур Гьажар КIундиннал шяраву Асадуллагьлул ва Аьжал кулпатраву. Шиккува кIицI лаган, аьпа биву, Асадуллагь совет заманнай цикссагу шиннардий зий ивкIссар КIундиннал «Да­гъусттан» колхозрал ГАЗ-53 машиналул шупирну. Аьжа тIурча, ичIаллилсса, оьрчIалссагу бувну, пекарнялий ччатI шахьлай. Вайннал цалва оьрчIругу тарбия бувссар цивппа кунма захIмат ххирану, буттал кIанттух ччаву дуну.
Буттал шяраву школагу къуртал бувну, Гьажар дуклан бувхссар Дагъусттаннал педагогический институтрал математикалул факультетрайн. Шивусса дуккаврищал цилва аьзизсса школалий математикалул дарсру дихьлайгу бивкIссар. Ларайсса кIулшивугу ларсун, цила шяравасса Маммаев МахIаммадлущал ташу бувну, кулпатрал хьуну махъ Гьажар бивзссар Самара шагьрулийн. Тийхва тарбиячи шайсса хасъсса кIулшивурттугу ларсун, зун бивкIссар оьрчIал багъраву. Жагьилсса вайннал кулпатраяр хьхьичI Самара шагьрулийн бивзссар Гьажардул уссурвал – Шамил ва Назим. Вайннал хъирив – МахIаммад ва Гьажаргу. Га диркIссар Чачаннал дяъвигу нанисса, бигьа дакъа­сса, даву лякъин захIматсса чIун. Савав укунсса хьуну, буттал кIанттуя архну ялапар хъанан ва зун багьарчангу, вайннаву хъисрагу хьхьара хьуну дакъар Да­гъусттаннахсса, цивппа бувсса, хъуни хьусса буттал шяраваллихсса ччаву. Шинал мутталий, гъинттул отпускалий ба­къагу, вай ххари-хъиншивурттайгу, къумашивурттайгу Дагъусттаннайсса гъан-маччаминначIан бучIайссар.
БувчIлачIисса зат бур оьрчIру къаххирану тарбиячину зун къабюхъайшиву. Хар-хавар бакъа ва пишалувун агьманащагу шикку лахъисса хIаллай зун къабюхъантIишиву, агарда оьрчIахсса ччаву дакIниву да­къахьурча. Гьажардун хъинну ххирар цилла даву, хIатта отпускалий бусса чIумалгума бизар хъанай бикIай мудан цилва итта­лу бикIайсса мюрщулт къа­ккаклай. ОьрчIал багъраву зузисса къачансса шиннардил дянив Гьажар цимилгу гьуртту хьу­ссар личIи-личIисса конкурсирттай. Ванил оьрчIал бугьайссар хьхьичIунсса кIанттурду. Гьажардуннив цинияргу хьхьичIунни оьрчIал нитти-буттал цилла даврия­сса рязишиву, вайннал чулухасса барчаллагь. Цимивагу миллатрал инсантурая сакин хьусса коллективраву дакI тIиртIусса, гьарцагу оьрчIал дакIничIансса ххуллу ляхълай, цилла даву дакIнийхтуну дуллалисса Гьажар бусраврай ва хIурматрай бур.
ХьхьичIунну цилла даврил бигарду бартбигьаврищал, Гьажар гьуртту шай Самара шагьрулий Дагъусттаннал культуралуцIун, багьу-бизулуцIун дархIуну хъанахъисса личIи-личIисса шадлугъирттайгу.
МахIаммадлул ва Гьажардул дянив ур 3 арс. Хъуна-хъунама арс, вузгу къуртал бувну, зий ур, вайми оьрчIру школалийн занай бур, агьаммур дуккаврищал архIал занай бур къавтIаврил кружокрайнгу, вайгу гьуртту шайссар шагьрулул дикIу, Самара шагьрулий ялапар хъанахъи­сса кIундиннал дикIу дуллалисса личIи-личIисса шадлугъирттай.
Гьажаргу, ванил цIанилу Аьрасатнал личIи-личIисса кIанттурдай бусравсса тарбиячинал пишарай зузисса жулва цайми лакку душругу барча буллай ва Кьинилущал, чIа тIий буру вания тийнмайгу чIярусса шиннардий цанна ххирасса даврий зунсса цIуллу-сагъшиву, гьавас, кулпатирттаву нахIушиву, ххаришиву, дунияллий – паракьатшиву.