ЦIуссалакрал райондалул администрациялул актовый залдануву хьунни ДР-лул Халкьуннал мажлисрал депутат Артур Исрапилов ва ЦIуссалакрал райондалул бакIчи МахIаммад-ХIажи Айдиев гьурттусса оператив совещание. Ванил лагрулий шяраваллал бакIчитуращал ва ВУС-рал (военно-учетная специальность) пишакартуращал ххал диргьунни ЦIуссалакрал райондалийсса мобилизациялул тагьар. Мукунма гьаз бунни военкоматрал дуллусса повесткартту диян даврил масъала.
КIицI лаган, райондалул каялувчитурал ччя-ччяни дай агьалинан Аьрасатнал Президентнал ва Дагъусттаннал БакIчинал хIукмурдал хIакъираву бувчIинбавуртту дуллалисса совещанияртту. Гьарица информация баян байссар шяраваллал бакIчитурайн. БувчIинбавуртту дайссар цIухху-бусу буллай бувкIсса инсантурангу.
Ва кьинисса совещаниялий агьалинал суаллан балжисса жавабру дуллунни Артур Исрапиловлул.
