Аьрасатнал Президентнал хIукмулийн бувну, нанисса шинал сентябрь зурул 21-нний дайдирхьунни цаппарасса чиваркIуннал мобилизация. Ванил хIакъиравусса суаллан жавабру дуллунни ДР-лул аьрали комиссар Дайтбаг Мустапаевлул.

– Мобилизациялийн бувну цуми буцлациссар аьра­луннаву къуллугъ буллан?
– ХьхьичIва-хьхьичI буцин­тIиссар I-мур разрядрал инсантал. Рядовой ва сержант – оьр­мулул 35 шинавун бияннинсса, мюрщими хIаписартал – 50 шинавун бияннинсса, хъуними хIаписартал – 55 шинавун бияннинсса.
Мукунма мобилизациялийн багьлагьиссар аьралуннаву къуллугъ бувсса ва аьралий хIадуршинна дусса запасрайсса инсантал. Миннаяр махъ бувцуми аьралуннаву къуллугъ бан хIадур бантIиссар. Мобилизациялийн бувну мукунма хьхьичI буцинтIиссар аьралий частьру хIасул дан аьркин дагьлагьисса сянатру думи.
Цуми махъун бичлачи­ссар мобилизациялия?
– Аьрасатнал законодательстволийн бувну мобилизациялия мурахас буллалиссар мобилизациялуцIун дархIусса давуртту дуллалисса организациярдай зузими;
— цIуллу-сагъшиврул тагьарданийн бувну чIумуйсса аьралуннаву къуллугъ бан къахъанахъими (вай 6 зуруйсса ма­хъун бичайссар);
— кулпатравусса мудан аякьа аьркинсса инсаннах ягу I-мур группалул инвалиднах буруглагими, агана миннах ургансса цама акъахьурча;
— балугъравун къабивсса ­уссил ягу ссил опекунтал, агана миннах ургансса цама акъахьурча;
— 16 шин хьуннинсса оьрмулувусса мукьва ягу ххишаласса оьрчIру буми, цалалу (нину дакъана) ца ягу ххишаласса 16 шинавун бияннинсса оьрчIалсса буллалими;
— лякьлуву 22 нюжмар хьусса оьрчI бусса хъаннил ласру;
— мукьва ягу ххишаласса 8 шин хьуннинсса оьрмулувусса уссу-ссу бусса адамина, агана циняв оьрчIру ниттил цилалу хъуни буллай бухьурча.
– Буллалиссарив мобилизоват аьралий кафедрардал, аьралий училищардал ва университетирттал студентътал?
– ПаччахIлугърал аккредитация дусса вузирдаву очнайну дуклакисса, запасрай бакъасса студентътал мобилизациялийн къабагьлагьиссар. Бакалавриат къуртал байхту магистратуралувун ягу аспирантуралувун бувхсса студентъталгу аьралий къуллугърая махъун бичлачи­ссар.
– Полициялул, МЧС-рал зузалт буцлациссарив аьралуннавун?
– Къабуцлациссар, цанчирча ми хасъсса аьралий учетрай буссар.
– Ци журалий, цукун дучIан аьркинссар повестка?
– Повестка дулайссар инсаннал цала канихьхьун къулбасгу дурну. Повестка дуркIманал щаллу дан аьркинссар мунийсса тIалавшинна. Цащала лавсун учIан аьркинссар мобилизациялул предписаниялий ккаккан бувсса документру.
– Мобилизоват увма къуллугъ буллалисса чIумал бюхъайссарив мунал кулпатраща дазул кьатIув гьан?
– Аьралий учетрай бакъаминнаща бюхъайссар.