МахIачкъалаллан 165 шин

МахIачкъалаллан 165 шин

Ларгсса бигьалагай кьини МахIачкъалаллан 165 шаврин хас дурсса хъуннасса концерт ккаккан дунни шагьрулул Хъун майданнив. Шагьрулул агьлу ва хъамал барча буллалисса ихтилат бунни Дагъусттаннал ХIукуматрал хъунама Аьбдулмуслим Аьбдулмуслимовлул. Ванал бувсунни шагьрулуву ххуй чулиннайсса дахханашивуртту хъанай душиву.

Агьали барча бунни МахIач­къалаллал мэр Салман Дадаевлулгу. Ванал бувсунни шагьрулул кучарду, паркру, скверду, оьрчIал площадкартту уттиния тийнмайгу бакьин буллантIишиву ва агьалинан къулайсса шартIру дуллай зий бушиву. ХьхьичI кьини МахIачкъалаллал Хъун майданнив мобилизациялийн къаршисса гъургъазардал хIакъираву мэрнал увкунни: «Культурагу ххирану дикIан аьркинссар, тарихгу кIулну бикIан аьркинссар. Буттал кIанттул цIанийсса Хъунмасса дяъвилул ппурттувугу Совет Союзрал хьхьичIунми артистътал концертру ккаккан дуллай бивкIссар, талаталтрал дакIру таза дуккан дуваншиврул, яхIливун бутаншиврул. ХIакьину шагьрулул военкоматрайн цивппа хушрай аьрайн буцара тIий букIлай бур инсантал, хIатта къабуцин багьлагьимигума».

Шадлугърай гьуртту хьун чIявусса хъамал цайми регионная бувкIссагу бия. Шагьрулул магьирлугърал школарттал оьрчIал тIутIал кацIру пишкаш бувна Украиннавусса аьралий иширттаву гьуртту хъанахъиминнан. Концертрай гьурттушинна дунни Дагъусттаннал районнаятусса ва шагьрурдаятусса коллективрдал, «Лезгинка» ансамбльданул ва А. В. Александровлул цIанийсса Аьра­сатнал армиялул балайрдал ва къавтIаврил академический ансамбльданул. Вайва гьантрай цаймигу хьунни шагьрулул юбилейран хасъсса мероприятияртту.
Шагьрулул хъунама ва ХIу­куматрал вакилтал хIаласса кьюкьлул тIутIив дирхьунни Хъун дяъвилий ливтIуминнансса гьайкалданучIа ва къуллугърал бурж биттур буллай ливтIусса низам дуруччай органнал зузалт­рансса мемориалданучIа.

Читайте также: