Муслим Телякавов хьунаавкьунни «Каспий-2022 форумрал гьурттучитуращал.

Дунияллул халкьуннал дянивсса «Каспий-2022» жагьилтурал форумрай ккаккан дунни «Ккавкказуллахсса талатаву» тIисса реконструкция. Ва ххал дуллалиминнавух бия ДР-лул ХIукуматрал председательнал хъиривчу Муслим Телякавов, ДР-лул жагьилтурал иширттал министр Камил Саэдов ва м.ц.
Мероприятиялул лагрулий 40 активистнал ва волонтернал аьралий янналуву ккаккан дунни ЯтIул Аьралуннал частирдал Ккавкказуллахсса талатаву. Баллай бия битлатисса ярагъуннил чIурду, аьралий балайрду.

Форумрай Муслим Телякавов хьунаавкьунни жагьилтуращал. Ванал кIицI лавгунни шиная шинайн форумрал гьурттучитал чIяву хъанахъишиву, жавабру дуллунни жагьилтурал суаллахьхьун. Хъирив грантирдал конкурсрай ххув хьуминнан дуллунни наградартту.
ДакIнийн бутан, Жагьилтурал иширттаха зузисса Федерал агентствалул буллалисса конкурсрал дия 15 номинация. Конкурсрай гьуртту хьусса проектирдан кьиматру бивщунни Аьрасатнал Жагьилтурал экспертный советрал. Ххув хьунни 16 инсан.

Вайннан цала проектру щаллу дан аьмну 4 миллиондалийн дирсса арцу дулун ккаккан бунни. Проектру шинал лажиндарай щаллу дантIиссар.
Донецкалиясса форумрал гьурттучинал, Дагъусттаннал Донецкаллал халкьуннан буллалисса кумаграхлу барчаллагьгу увкуну, бахшиш бунни Донбассрал тарихраясса лу.
КIицI лаган, «Каспий-2022» форумрал сакиншинначину хьунни ДР-лул Жагьилтурал иширттал министерство. Вайннан кабакьу бунни ДР-лул ХIукуматрал ва «Аьрасатнал жагьилтал» федерал агентствалул.