БавтIцири барча бунни Ккуллал райондалул хъунама Шамил Рамазановлул, Дагъусттаннал муфтинал хъиривчу АхIмад МахIаммадовлул, Ккуллал райондалул имамтурал советрал хъунама МухIаммад-Маннар Бариевлул, Лакрал райондалул имамтурал советрал хъунама МухIаммад Ссаламовлул, Дарбантливсса МухIаммад Ярагъскийл цIанийсса мизитрал имам МухIаммад Майрановлул, Гъази-Гъумучиял имам Ансар Сулаймановлул ва цаймигу бусравсса инсантурал.
Конкурсрай цалчинмур кIану бувгьуманан бахшишран буллунни автомобиль Hyundai Solaris. Ва машиналул заллуну Гъумучатусса ХIусайнова Уммукулсум хьунни. КIилчинмур кIану бувгьуманан дуллунни 300 азарда къуруш арцул, шамилчинмур кIанттухлу – 150 азарда къуруш. Ялагу хьхьичIунминнавасса 7 инсан ххари унни бахшиширттайну. Конкурсраву гьурттушинна дунни оьрчIалгу, жагьилтуралгу, бугьараминналгу. Сиптачитурал бувсмунийн бувну, яла чIавама гьурттучинан 8 шин дур, яла хъунаманан – 80 шин. Конкурсрал сиптачи ур Ваччиял имам ДибирхIажи Рамазанов.
– Жул гьанумур мурад – Лакрал ва Ккуллал районнал агьалинаву МухIаммад-Идавсил (с.аь.с.) оьрму бюхъайссаксса чIявусса инсантуран лахьхьавуя. ЧIявусса инсантал гьуртту шаврилгу исват бунни жул мурад щаллу хьушивугу. Ххув хьуминнавух бакъанугу, Идавсил (с.аь.с.) оьрму лавхьхьуми цинявгу барча буллай ура,– увкунни МухIаммад-Маннар Бариевлул.
1-мур кIану – ХIусайнова Уммукулсум (Гъази-Гъумучи)
2-мур кIану – Оьмарова Сабина (Щар)
3-мур кIану – ХIажиева Шюъбанат (Ваччи)
4-мур кIану – Аьлиева Наида (Ваччи)
5-мур кIану – Аюбова ХIабибат (Гъази-Гъумучи)
6-мур кIану – Куяев Минкаил (Гъази-Гъумучи)
7-мур кIану – Оьмарова Разият (Гъази-Гъумучи)
8-мур кIану – Рамазанова Радмила (Ваччи)
9-мур кIану – ХIажиев НурмахIаммад (Гьущи)
10-мур кIану – ХIусайнов Жамбулат (Лакрал район).
