Цашиврул кьини – МахIачкъалалив

Цашиврул кьини – МахIачкъалалив

Яла жагьилми байраннавасса ца – Дагъусттаннал халкьуннал Цашиврул кьини яргсса личIи-личIисса шадлугъирттайну кIицI ларгунни республикалул хъуншагьрулий.

Сентябрьданул 15-нний кIюрххила шагьрулул хъун майданнив хьунни митинг. Шикку махъру лавхъуна ДР-лул миллатрал политикалул ва диннал иширттал министр Энрик Муслимовлул, ДР-лул БакIчинал ва ХIукуматрал Администрациялул жяматийсса проектирдал отделданул начальник Шамил Аьлиевлул, ДР-лул Халкьуннал мажлисрал депутат ХIасан ХIусмановлул, Украиннайсса хасъсса аьралий операциялул гьурттучитал Марат Халикьовлул ва Ибрагьимхалил ХIажиевлул, Украиннай хасъсса аьралий операциялий виричушиврий жан дуллусса Алик Гъазиевлул ниттирссу, «Илчи» кказитрал отделданул редактор Зулайхат Тахакьаевал ва цайминнал.
Шагьрулул хъунмайданнив­сса батIаву къуртал хьуна миллатирттал яннардавусса флешмобрайну. Ваний гьуртту хьуна республикалул сайки гьарцагу райондалиясса ва шагьрулия­сса коллективру.

Хъиривра М. Горькийл цIа­нийсса Оьруснал театрданул хьхьичIсса майданнив хьунни МахIачкъала шагьрулул администрациялул Культуралул управлениялул сакин дурсса концерт, Аьрасатнал халкьуннал аслийсса культуралул центрдал «Традиции» цIанилусса Республикалул форумгу.
Ва кьини шагьрулул цайми майданнайгу хьунни личIи-личIисса шадлугъру. Республикалул музейрдалгу хIадур дурну дия ва Кьинилун хасъсса программартту, вайннул лагрулий хьунни выставкартту, кинопоказру, квест-тIуркIурду.

Ахттакьуннай тIурча, Т. Мурадовлул цIанийсса Дагъус­ттаннал паччахIлугърал филармониялул Гъинтнил эстрадалий хьунни республикалул язими коллективру, мукунма Чачаннава ва Ухссавнил АьсатIиннава-Аланиянава бувкIсса артистътал гьурттусса хъуннасса концерт. Ва ххал дуван бувкIминнавух бия Дагъусттан Республикалул Халкьуннал мажлисрал председатель Заур Аскендеров, махъсса депутатътал, республикалул личIи-личIисса министерстварттал ва ведомстварттал каялувчитал ва цаймигу къуллугъчитал.
Концерт дайдирхьуна Да­гъусттаннал опералул ва балетрал театрданул ва Дагъусттаннал культуралул ва искусствалул Б. Мурадовал цIанийсса колледжрал студентътурал хIадур дур­сса этюдрайну.

Концертрал гихунмаймур бутIа сакин хьуну бия «Ттул Дагъусттан» тIисса музыкалул ва шаэрлугърал композициялия. Ванил лагрулий, ПаччахIлугърал халкьуннал инструментирттал оркестрданухун, республикалул театрдал артистътурал щаллу бувна Дагъусттаннал шаэртурал произведенияртту. Вайннувух, гьай-гьай, Фазу Аьлиевал ва Расул ХIамзатовлулмигу, гьашину хьусса 90 шинал ва ялун нанисса шинал хьунтIисса 100 шинал юбилейрдугу хIисавравун ларсун.
Республикалул Халкьуннал творчествалул къатлучIасса фольклорданул коллективир­ттал хIадур бувну бия «Аьдатру» тIисса цIанилусса балайрдал ва къавтIавурттал яргсса композиция.
Концертрай дакIний ли­чIансса номерду ккаккан бунни республикалул оьрчIал творчествалул коллективиртталгу. Концерт къуртал хьуна салют ритаврийну.

Читайте также: