Сентябрь зурул 21-нний хьунни Республикалул хъуншагьру МахIачкъалалун 165 шин шаврин хас дурсса «Российское движение школьников» тIисса Щалагу Аьрасатнал оьрчIал ва чIава жагьилтурал организациялул слет.

Шикку гьуртту хьунни республикалул кIулшивуртту дулаврил ва коммерческий дакъасса жяматийсса идарарттал 3000-ннийн бивсса вакилтал, бусравсса хъамал ва дуклаки оьрчIру.
Слетрай Аьрасатнал дуклаки оьрчIал суккушиннарал кьюкьравун кьамул унни 600 дуклаки оьрчI.
Дуклаки оьрчIахь насихIатрал махъ лавхъунни ДР-лул Халкьуннал мажлисрал депутат Камил Давдиевлул.

– Хъунмур никиран кIулссар цила чIумал жува цинявппа октябрятану, пионерталну, комсомолталну бивкIшиву. ЧIявуминнан вай идарарттал тIивтIуссар чаннасса бучIантIимур бусса оьрмулул ххуллурду. Вайннава цикссагу бувкссар республикалул ва билаятрал каши-кьудрат хьхьичIуннай давриву хъунмасса бутIа бивхьусса машгьурсса жяматийсса ва политикийсса ишккаккулт. Умуд бур зул дянивагу республикалул цIа-кьини бюхттул дансса цикссагу жагьилтал букканссар тIисса, – увкунни Камил Давдиевлул.