«Жу дагъусттанлувтурал оьрму ярг буванмур буллай буру»

«Жу дагъусттанлувтурал оьрму ярг буванмур буллай буру»

Сентябрьданул 13-нний «Дагъусттан» РИА-лий хьунни ДР-лул культуралул министр Зарема Буттаевал пресс-конференция. Ва хас бувну бия культура хьхьичIуннай даврил масъаларттан.

Журналистътуращалсса хьунабакьаврил бакIрай министр­нал бувсуна Фазу Аьлиевал 90 шинал юбилейран хасну ва Расул ХIамзатовлул 99 шинал таварихрацIунми шадлугъирттая ва 2023-ку шинал хъунасса шаэрнал 100 шинал юбилейрацIун дархIуну щалвавагу билаятрай, хIатта чил билаятирттайгума, дуванмуния.

– Фазу Аьлиевал юбилейрал шадлугъру хьуссар школалийсса личIи-личIисса конкурсирттал, республикалул театрдал ва концертирттал майданнайсса личIи-личIисса проектирдал, выставкардал, луттирду итабакьаврил ва чIяру-чIярусса цаймигу давурттал журардай. Вайннувух гьурттуну буссар республикалул цинявппагу муниципалитетру, театрдал-концертирттал, библиотекарттал, кIулшиву дулаврил идарартту. Мукунна гьашинура дайдихьу дуварду ялунчIил кIицI лагантIисса Расул ХIамзатовлул 100 шинал юбилейрал шадлугъирттал – Аьрасатнал Чичултрал союзрал пленумращал сайки ца чIумал хьусса «КIяла кьурукьирттал кьинирдайну» ва цаймигу иширттайну.

Журналистътурал буллусса (республикалул театрдалмур даврий шаэрнал юбилей цукун асар хьунтIиссар тIисса) суаллавасса цаннихьхьун жаваб дуллай, министр­нал бувсуна шаэрнал чивчумунийн бувсса постановкартту чансса къабикIантIишиву, цIанасса чIумал Лакрал театрданул паччахIлугърал чулухасса субсидиярттацIух хIадур буллай бушиву Расул ХIамзатовлул «Последняя цена» произведениялийн бувсса премьера.

Гихунмай З. Буттаевал бувсуна «Культура» тIисса Национал проектрал ва жагьилтурансса Щалагу Аьрасатнал «Пушкиннул карта» программалул лагрулий дуллалими давурттая:
– Вай проектру иширттайну щаллу дуллай, жу хIарачат буллай буру жулва дагъусттанлувтурал оьр­му хъинмур чулухунмай баххана буван, ярг буван, буцIин буван…
«Пушкиннул карталия» буслай, кIицI лавгуна Дагъусттан ва карта ларсъсса жагьилтурал ккалданийн бувну билаятрай хьхьичIунминнал сияхIрай бушиву, цIананин 85 азарда карта тIиртIушиву, картардайн бувну жагьилтурал кIунттихьхьун буллушиву 180 азарва билет. Амма, укун бунугу, ва давривух шайссаксса чIявусса жагьилтал гьурттуну бикIаншиврул, ттигу дулланмур къачанни, шикку ихтилат, хъунмурчIин, республикалул мюрщи шагьрурдай ва шяраваллаву ялапар хъанахъими оьрчIаяр. Министрнал бусласимунийн бувну, Дагъусттаннайсса анжагъ гьарца мукьулчинсса оьрчI хъанай ур ва карталул заллуну, паччахIлугърал итадакьлакьисса арцул къачIивисса бутIагу личIлай бур ишла къабувнува, аьркинну бур хаснува шяраваллал кIанттурдай ва карта машгьур давриха зун. Шиккува дакIнийн бутан, «Пушкиннул карта» ласун бюхъайссар (укра) оьрмулул 14 шинава 22 шинавун бияннинсса жагьилтураща ва мунищал жулла республикалулгу, щалва билаятралгу культуралул идарарттавун уква гьан (музейрдавун, театрдавусса постановкарттайн, концертирттайн, агарда вай «Пушкиннул карталийну» гьан шайсса шадлугъирттал сияхIравун ларсун духьурча). Карталийсса арцул лагру дукIу дуссия 3 азарда къуруш, гьашину тIурча, 5 азарда къуруш дур.
Бувсуна республикалийсса культуралул къатри ва библиотекартту ци хIалданий буссаривгу.

– ЖучIава бур 957 культуралул къатта, 970 библиотека. Культуралул къатрава бачIими бур лащинсса тагьарданий. «Культура» проектрал лагрулий бювхъунни сайки 60 культуралул къатта багьайсса даражалийн буцин. Ва бакъассагу, библиотекарттал даву цIусса нирхиравун дутлай, тIитIлатIиссар цIусса никирал библиотекартту – модельный. Каспийскалий, шагьрулул кьини, тIитIинтIиссар республикалийн шамилчинмурну хъанахъисса модельный библиотека. Мукунма МахIачкъалаливгу шагьрулул кьини тIитIинтIиссар вава журалул ирглийсса библиотека.

Зарема Буттаевал дакIнийн бувтуна сентябрьданул 26-нния октябрьданул 4-ннин жулла республикалий хьунтIишиву «Русская сцена» фестиваль, билаятрал шагьрурдаясса театрдал хьхьичIунсса коллективругу гьурттуну. Ва хьунтIиссар театр ххираминнансса мяйжаннугусса байран. Бувсуна туристътал кIункIу баву мурадрай ДР-лул Минтуризмалущал архIал дуллай байбивхьуми ва дуван дакIнийми давурттаягу.
Культуралул министерствалул дуллалисса чIяру-чIярусса давурттаву къачIивисса кIану бугьлай бур оьрчIанми давурттал. Дурминнуя къатIий, министрнал бувсунни ялуннин дакIний бушиву жулла республикалий буван Культуралул форум, личIи-личIисса муниципалитетирттавасса гьунар бу­сса оьрчIру ялун личин баншиврул, цачIун баншиврул.

Читайте также: