Сентябрь зурул 9-нний МахIачкъалалив цIанихсса аьлимчу, физик-ядерщик, техникалул элмурдал доктор, Лениннул премиялул лауреат, Жабраиллул арс Амир Амаевлул цIа Торговая тIисса кучалун дизлазисса шадлугъ хьунни.
Шиккун бавтIцириннавух бия Республикалул ХIукуматрал вакилтал, депутатътал, жяматийсса ишккаккулт, ГьунчIукьатIрал шяраваллил агьлу.
Мероприятие дачин дурну ия МахIачкъала шагьрулул депутатътурал мажлисрал хъунама Марис Илиясов. Ванал, шадлугърал дайдихьу дуллалисса махъ лахълай, кIицI лавгуна Амир Амаев билаятрал атомрал энергетика хьхьичIуннай давриву хъунмасса бутIа бивхьусса аьлимчу ушиву ва ванал аьпа уттава бувансса хIукму бувшиву Шагьрулул мажлисрал депутатътурал июль зурул 28-нний. ГьунчIукьатIрал школалул директор Малик Къушиевлул кIицI лавгуна жяматрал тарихраву яргсса ххуттай личIансса кьини душиву цIанихсса аьлимчунал цIа шагьрулул кучалун дирзсса ва кьини, чIярусса орденну ва медаллу ларсъсса, Лениннул премиялуцIун, СССР-данул Минатомрал, СССР-данул Министртурал Советрал ва цаймигу бусравсса премиярттан лайкь хьусса аьлимчунал цIа гьаз дуллалисса даву ччянира дуван аьркинсса даву душиву.
ГьунчIукьатIрал Жяматийсса советрал хъунама ХIажибутта ХIусайновлул балжину бувсуна Амир Амаевлул оьрмулул ххуллия, кIицI лавгуна ва цува хушрай аьрайн лавгун ивкIшиву ва ванал цIа атомрал элму гьаз дурминнавух язимур ххуттай личIантIишиву. Бувсуна ванан декабрь зурул 28-нний 100 шин хьушиву ва Аьрасатнал паччахIлугърал мюхчаншиврул гуж-кьуват цIакь бувавриву хъунмасса бутIа бивхьусса профессорнал цIа абад дуллай бушиврия цинявгу ххарину бушиву.
Амир Амаевлул суратращалсса ва цIанищалсса мармарчарил улттуя пардав гьаз дуруна Марис Илиясовлул ва Москавлия хасну ва мероприятиялий гьуртту хьун увкIсса аьлимчунал арс Валерий Амаевлул. Ванал барчаллагь куна Дагъусттаннал ХIукуматрахь, шагьрулул мажлисрал депутатътурахь, буттал цIа Дагъусттаннай абад дувансса давуртту сакин даврихлу.
