Дарувсса щинал кьуллалуцIунсса бусала

Жул, Ккуллал, шяраву ччянива бивкIун бур Камалхъул тIисса, гьарзасса хъу-лухччигу, ятту-гъаттарагу бусса, агьлу. Миннаясса бур ЛухIухъулгу.

Ва тухумрал ХIажи-Рамазан тIисса жагьил, ца кьини цала ххалал лухччинийн цулун лавгун унува, ахттайн бивзсса ппурттуву, цахьрасса ахттайн­ссагу дуркуну, лахъсса урттуву игьалаган чулий агьну унува, шанул ляхлавгун ур. Шанашийни, га кьацI тIивтIуну ухьунссия, цукун, ча тIайла бавцIуссарив къакIулну, ганавун шатта-кьюрщала зумунусса цирив ца зат дурххун дур. Га чантI увкуну ур, лахъну вев-гьарайгу тIий, ццаххандарал увгьуну. Ганал чIуний бавтIун бур гивахва цала ххалал давурттай бивкIсса инсантал.
– Ттул лякьлуву щуруй цирив ца зат дур! – тIий ивкIун ур га синхралну.
Цала балчаннуйгу буртти ивтун, га иян увну ур шяравун, шавай.

Вари чинсса духтурталгу къабивкIсса та заманнай, увцуну ур урттуйну халкь хъин бувайсса Кьумав МахIмуд тIисса ца шяравучуначIан.
ХIасил, ва адаминал маслихIат бувну, бакI-каругу зурчIайтIи дурну, жагьил занази увну ур балчаннуй, чIумуя-чIумуйн ганавун витгу бутIлай, цукунчIавсса цамур дукиягу къадуллуну. Щаллусса махIлалул инсантал бивкIун бур бавтIун, ганалсса буллай, Кьумав МахIмудлул кумур бартбигьлай. Мукун занази увну ивкIссар тIий бур сайки кIира кьини. Ахиргу, ца базилух багьну бур щяв бивкIусса ша­тта: га бия тIар личIину лахъигу бакъасса щюллисса.
Шаттагу бувккун, цувагу сайки хIалдания лавгсса оьрчI иян увну ур шавай. Гава Кьумав МахIмудлул маслихIатрайн бувну, чан-чансса гъили накI хIачIлачIи уллай, ХIажи-Рамазан къулай хъанан ивкIун ур.

ОьрчI ххуй хьурча, жямат­рал щин ласлансса кьулла банна куну, нудру бувну бивкIун бур га оьрчIал буттал. Увгьуну усттар, бугу-бувну бур ххаллилсса цIувцIу чарил кьулла. КIинттулнияр гъинттул дяркъу­сса щингу дикIайссар кIа кьуллалуву.
Ва иширая кIулсса ЛухIу­хъаяту цучIав ливчIун акъар. Ва ттухь бусайва ттулла бабал. Шамсуттингу мукьав лавчIун, цурдагу дуссияв тIива та шатта буккан буллай бивкIсса кIанттай.
Ттун ниттил ниттин хьуну дикIайва 108 шин, кIа дикIайва на ва кьуллалулла ваксса хIаллай ядурсса тIий: чIиринийгу – ши­ккура, щар хьунийгу – шиккура тIий. «Вай щин даруврал щинни, ттул цичIав цIун къадиркIссар оьрмулуву, зува чув бухьурчагу, щин кIа кьуллалия лалусияра», – учайва кIанил.
Нагу чичав ва хавар ниттил ниттил ттухьва бувсун бивкIсса куццуй.

ЛухIухъал Бахъи,
ш. Ккул