Сентябрьданул 1-нний оьрмулул 85 шин хьунни 50 шинай элмулуву ва кIулшивуртту дулавриву зий ивкIсса, Дагъусттаннал паччахIлугърал университетраву химиялул факультет гьаз буллай оьрму гьан бувсса аьлимчунан ва преподавательнан, 1-мур ЦIувкIратусса МахIаммадлул арс Юнусов Кьурбаннун.

Увссар Кьурбан 1937 шинал 1-мур ЦIувкIрав школалул директорнал кулпатраву. Ванан 5 шин хьусса чIумал Хъун дяъвилий чувшиврий жан харж дурну дур ванал буттал. Юнусхъал ПатIиматлун шанма оьрчI цинмалу ччаннай бацIан буллан багьссар. ОьрчIаву хъунама ивкIссар Кьурбан. Ниттил хъунмасса хIарачат бувссар оьрчIру лайкьну чивун буккан буван. Ниттийсса хъар чIалай, ххювардай дугу-дуклай, ичIаллил хъар куклу дувансса захIматгу буллай ивкIун ур Кьурбан, уссилсса ва ссилссагу буллай.
Буттал шяраву арулва класс, яла Каспийскалий интернатгу къуртал бувну, Дагъусттаннал паччахIлугърал университетрал химиялул-биологиялул факультетрайн дуклан увххун ур Кьурбан. Дуклай унува тиккува университетраву зийгу ивкIун ур. Гихунмаймур оьрмугу химиялул факультетрацIун бавхIусса хьуну бур. Университетрал ректоратрал химиялул факультет личIи бувайхту, ванайн тапшур бувну бур му факультетрал даву сантирайн дутан. 1990 шиная 2001 шинайн ияннин деканну зий ивкIсса Кьурбаннул хIарачатрайну хъуни­сса хьхьичIуннайшивуртту хьуну дур.

1971-кусса шинал ванал дурурччуссар химиялул элмурдал кандидатнал диссертация. Аьмну Дагъусттаннал университетраву ва зий ивкIссар ххюцIалунниха лирчусса шиннардий. Ва ур сайки ряхцIалунничIан дирсса элмийсса макьаларттал автор. Ванал макьалартту, элмийсса хъиривлаявурттал хIасиллу аьч дуллалисса давуртту дуссар вузирттансса справочникирттай ва студентътурансса учебникирттай.

Ванащал архIал тай шиннардий зий бивкIсса преподавательтал мудангу хIурматрай буслан бикIай, жагьилсса унува, педагогнал даврил мухIлу-хIин ххуйну кIулсса, цала пишагу, студентъталгу ххирасса, тIалавшинна дусса икIайва тIий. Кьурбаннул чIярусса наградарттавух дур «Дагъусттаннал лайкь хьусса учитель» тIисса цIагу, «Аьрасатнал Федерациялул элмулул ва кIулшивуртту дулаврил бусравсса зузала» тIисса цIагу.

Ялун ххи буван ччива ва, цалла даву хъинну кIулсса каялувчи, учитель, аьлимчу ушаврицIун, ххаллилсса ппу, лас ва ттатта ушивугу, ччяни дунияллия лавгсса, аьпа биву, бакIралгу ххуй­сса, дакIнилгу хъинсса, гьармуниву итххявхсса ТIажибхъал Марияннущал 2 душ ххуйну тарбия бувшиву, вайннал кулпат ца яла мяърипат думи, хьхьичIунми кулпатирттавух бушивугу.
Кьурбаннун ххирассар буттал шяраваллил агьлу, дурссар шяраваллил жяматрал бусрав-барчаллагьрай кьамул дурсса давурттугу.

Оьнийгу, хъиннийгу мудан жяматрал иширттал чIарав уссар. ХIакьинуссса кьинигу маслихIат ккаккан ваначIан буххайссар шяраваллил активистътал. КIицI банна ва ттула ниттил ссурахъу ушивугу, ни­ттиннив ва уссиха личIи акъа ххирасса ивкIшивугу. Ковидрал бас увну, захIматну къашавай унува, ва жула ниттил ссукIурай щяикIан учIавугу хъинну бусрав хьуна жун.
Пахру-ххара бакъасса, адаврай къуццу тIутIисса ва жуна цинявннан эбратрансса инсаннан – ниттиуссу Кьурбаннун чIа тIий бура цIуллу-сагъшиву чIярусса шиннардий, цала дакIниймур бартлаган буллай, даймур-дитаймур тирххандарансса хъанай личIаннав тIий.