Терроризмалущалсса талатавриву цашиврул кьинилун хасну ва Аьрасатнал Президентнал чул бугьлай, МахIачкъалалив, Лениннул майданнив, хьунни митинг-концерт. Ва хьунни «Ватандалул Вирттаврал вахта» проектрал лагрулий.
Шикку гьуртту хьунни Аьрасатнал Вирттал Игорь Медоев, МахIаммад Гьимбатов, Загьид Загьидов, Абубакар Костоев, Рустем Клупов, Владимир Ковтун, Александр Чернов, Владимир Алимов, Олег Лобунец, «Аьрасатнал Вирттаврал Ассоциация» жяматийсса организациялул вакилтал Светлана Гурина, Василий Ковальчук, Ирина Лампартер, Дагъусттаннал властьрал органнал, жяматийсса жагьилтурал ва аьралий-патриот организациярдал, мукунма рувхIанийсса организациярдал вакилтал. Концертрай чялишсса гьурттушинна дунни Дагъусттаннал вузирдал ва ссузирдал студентътурал, Ххувшаврил волонтертурал, ТОКСовцынал, Юнармейцынал, Аьрасатнал дуклаки оьрчIал суккушиннарал (РДШ).
Митинг-концерт дайдирхьунни Ватандалухлу жанну дуллусса совет ва Аьрасатнал вирттавран хас бувсса «Я внук солдата» тIисса патриот балайлийну. Балай щаллу бунни Дагъусттаннал халкьуннал артистка Зульфия Илиясовал ва ОьрчIал филармониялул солист Мурад Хушлаевлул.
Шиккун бавтIми барча буллалисса ихтилат бунни Аьрасатнал Виричу, Мюхчаншиврул Советрал Секретарь МахIаммад Баачиловлул.
Аьрасатнал Виричу, полковник Александр Черновлул, Украиннавусса аьралий операциялуву гьуртту хьусса Имам Бейбутовлун ва Марат Рамазановлун дуллунни «Отвага, Честь, Слава» тIисса Аьрасатнал Вирттаврал Ассоциациялул наградартту.
Хъирив ихтилат бувсса Дагъусттаннал Ветерантурал советрал председатель, ВДВ-лул полковник МахIарам Аьлиджановлул барчаллагь увкунни ДР-лул миллатрал политикалул ва диндалул иширттал министр Энрик Муслимовлухь, гьарица шинахсса «Ватандалул Вирттаврал Вахта» проектрал сакиншиннарахлу.
Мероприятиялий гьуртту хъанахъисса жагьилтурахь ванал увкунни жандалия ка ларсун цала хьхьичI бивхьусса бигарду щаллу бувсса Вирттаврая эбрат ласияра куну. Игорь Медоевлул барча бунни цинявппа аьсатIиннал халкьуннал цIания.
Ванал оьвчаву дунни жагьилтурайн спортрахун багьан, цала цIуллу-сагъшиврул ялув бацIан ва Ватандалул лайкьсса арсру хьун.
Дагъусттаннал Хъаннил союзрал председатель Интизар Мамутаевал барчаллагь увкунни Вирттаврахь ва хъуннасса агьамшиву дусса хьунабакьаврихлу, кIицI ларгунни хIакьину Украиннавусса аьралий операциялуву гьуртту хъанахъиминнал ва 90-ку шиннардий Дагъусттаннал ва Аьрасатнал цашиврул цIаний талай бивкIминнал къучагъшиву. Ванил мукунма бувсунни Украиннавусса аьралий операциялуву гьуртту хъанахъисса Аьрасатнал аьралитуран Дагъусттаннал хъаннил буллалисса кумаграя.
Митинг-концертрай мукунма ихтилатру бунни Рустем Клуповлул, Дагъусттаннал Муфтиятрал просвещениялул отделданул каялувчи ХIусайн ХIажиевлул, Имам Бейбутовлул.
Ххаллилсса концертрал программа ккаккан дунни Т. Мурадовлул цIанийсса Дагъусттаннал паччахIлугърал филармониялул артистурал ва Дагъусттаннал эстрадалул чанна цIурттал.
