Дагъусттаннал кIулшиву дулаврил тарихраву гьашинусса дуккаврил шин тIайлабацIу бусса шинан ккалли дуван­сса хIуччарду чIявур: сентябрь зурул цанний Дагъусттаннай цIуну тIивтIуссар кIулшивуртту дулаврил 21 объект ва гьашину капремонт дурссар 200 школалий. КIулшиву дулаврил ва элмулул министерстволул вакилтурал бувсмунийн бувну, 500 азаруннийн бивсса дуклаки оьрчIру лавгссар школардайн, аьмну республикалий бу­сса бур 2581 дуккаврил идара.

КIулшивурттал кьинилул байран личIинура яргсса ва дакIний личIансса дикIай, гьай-гьай, цалчинми классирттавун цалчин наниминнан. Гьашину республикалий цалчинми классирттавун лавгун бур 55 азарунниха ливчусса оьрчIру. МахIачкъалалив цIусса дуккаврил шинал партардах щяивкIун ур 106 165 дуклаки оьрчI. Вайннавагу 12 азара – цалчинми классирттавун. МахIачкъалаллал 33-мур школалий цалчинсса гюнгутIи бивщунни цалчинмур классравун нанисса 1-мур ЦIувкIратусса аьнтIикIа МахIаммадова Асиял. Ва Печатьрал ва информациялул агентстволул хъунаманал хъиривчу Наида МахIаммадовал арснал Рамазаннул душри.

– Цума-цагу дуклаки оьр­чIан оьрмулухун дакIний ли­чIайшиврий дакI дарцIуну бура цалчин школалийн лавгсса кьини. Жугу – навагу, лас Мурадгу, учиннуча, щалва кулпат бувкру Асиял кьини хъун дуван, ва школалийн тIайла бу­ккан. ОьрчIал дакIурдиву ва буниялттунсса байран душиврул асар личIан аьркинссар, школарттай каялувшиву дуллалиминнал хIарачат бувну бикIай му даражалийсса байран дуваншиврул. Жул душ лавгсса № 33 школалийгу ва байран лахъсса даражалий хIадур дурну дия, хъамалгу чIявуя. Жулва оьрчIан гьарца чулуха тIайлабацIусса шин хьуннав ва ялун дирсса цIусса ду­ккаврил шин! – тIий бур Наида.