Аьдатравун дагьну дур цумур-дунугу шяраваллил жагьилтал шагьрулий цачIун бавтIун, хайр-мюнпатрансса давуртту дуваву. Август зурул 29-нний МахIачкъалаливсса Ахъушинскийл кучалийсса чIатIаракIру ритай центрданийн бавтIун бия ЦIувкIуллал жагьилталгу. Ва даврил сиптачиталну бия Ккуллал райондалул жагьилтурал идаралул ( ДРОО «Молодежь Кулинского района») председатель Гуйдалаев АьбдурахIман, ЦIувкIуллал шяраваллил бакIчи Илдаров МахIаммадрасул ва шяраваллил имам Муса Аьлиев.
Хьунабакьаврий гьаз бувна шяраву дуллан аьркинсса давурттал масъалартту. КIицI лавгуна шагьрурдайсса ва шяравусса жагьилтурал ва жяматрал арарду хIура-чIула дуккан къаритансса чаранну ккаклан аьркиншиву, цинявннал агьаммур мурад – буттал кIану ябаву бушиву. Диндалул ххуллу-ххагу бурувччуну, шяраваллил агьалинал маэшат гьаз бувансса давурттаха зунсса чарабакъашиву душиву.
«ЦIувкIуллал шяравунсса ххуллу бакIлавай нанисса бухьувкун, асфальт бутIин шайсса ххуллу бакъар. Райондалийн газ буцирчагу, ЦIувкIуллалмур шяравун биянсса, къабиянсса къакIулли, ххуймунийн умудрай бунугу. Жагьилтал цIанакул лагма лавгун, шяравалу ядувансса хIарачат къабарча, ялун нанисса никирал шяравалу ядаврил буруккин бикIансса ххай акъара. Бур чантI увкусса, шайсса кумаг буллалисса жагьилтал, вайннаяту эбратгу ларсун, махъ ца бувну, къуццу тIунссару тIий ура», – увкунни МахIаммадрасул Илдаровлул.
Агьамсса суаллу ххал бивгьуну махъ чIатIаракIру ритаврил бяст-ччаллий бувккунни. Турнирданий 1-мур кIану бувгьунни Халилбагов Мурадлул, 2-мур кIану – Кьурбанов МухIаммадаьлимлул, 3-мур – Оьмариев Бадавинал. Мероприятиялий гьуртту хьунни Ккуллал райондалул имам МухIаммад-Маннар Бариевгу. Ваналгу чIатIаракI ритаврил мастер-класс ккаккан бунни.
