Август зурул 21-нний ЦIуминалийсса ЦIуссалакрал Аьхъардал школалий хьунни Авиациялул кьинилун хасъсса шадлугърал мажлисру. Аьхъардал школалун дирзунни Буттал кIанттул цIанийсса Хъун дяъвилий къучагъну талай ивкIсса, авиациялул майор ХIажинал арс Султан Мусаевлул цIа.
Райондалул жяматгу лагма лаган бувну, чIявусса хъамаллурайнгу оьвкуну, шадлугърал даражалий школалул къатрал чIирай ларчIунни Султан Мусаевлул аьпа абад буллалисса мармарчарил ула. Школалул къатрал чIарах нанисса кIичIираваллийнгу Султан Мусаевлул цIа дирзунни.
Виричунал аьпа абад буллалисса мажлисрай гьуртту хьунни ЦIуссалакрал райондалул бакIчи МахIаммад-ХIажи Айдиев, ДР-лул жагьилтурал иширттал министр Камил Саэдов, Аьрасатнал Виричу Загьид Загьидов, Аьхъардал жямат ва Султан Мусаевлул мачча-гъанми.
Ва мероприятие лайкьну тIайла дуккаву мурадрай, сакиншиннардал давурттавух хъуннасса гьурттушинна дурунни райондалул каялувчинал. Байран тIайла дуккан, хъамал кьамул бан хIадур хъанай хъунмасса захIмат бивхьуну бия Аьхъардал школалул директор Ибрагьимова Светланал, учительтурал коллективрал ва дуклаки оьрчIал. Шадлугърал мажлис бачин бувну ия жагьилтураву сийлийсса, конферансье Арсен ЛухIуев.
Мажлис тIитIлай, Султан Мусаевлул эбратну ва виричуну бувтсса оьрмулул ва аьрали ххуллия бувсунни ЦIуссалакрал райондалул бакIчи МахIаммад-ХIажи Айдиевлул.
– На хъинну ххарину ура Султан Мусаев кунасса, бусалдаравун агьсса къучагънал цIа жула райондалул школалун дизаврия. Ва буниялагу хIакьсса зунттал хасият дусса, виричусса инсан ивкIун ур. ОьрчIнийва летчик хьун хияллай ивкIсса жагьил, дуклан увххун ур Ттуплисливсса летный школалин. Мугу къуртал бувну, лавгун ур Султан аьралуннаву къуллугъ буллан. Аьралуннава зана хьуну махъ, лаваймур летный училищагу къуртал бувну, хьуну ур ваная штурман. Лехлай ивкIун ур личIи-личIисса самолетирттай. Султан Мусаев гьуртту хьуну ур Япуннащалсса дяъвилийгу. Буттал кIанттул цIанийсса Хъун дяъви байбивхьуния шийнмай, къуртал хьунцIа, аьрали летчикная айивхьуну, отрядрал командирнайн ияннин, бивтун бур ванал аьрали ххуллу. Цума ухьурчангу, дяъвилул цIаравух увксса инсан виричунан ккалли уван лайкьссар. Султан Мусаев кунасса виричу жула дянива уккаврия хъунмасса пахру бикIан аьркинссар.
Дяъвилия зана хьуну махъгу Султан зий ивкIссар райондалул жаваблувсса къуллугъирттай: 1946 -1948 шиннардий – Новочеркасск шагьрулий райкомрал инструкторну, 1949 шинал – ЦIуссалакрал райондалул финотделданул хъунаману. Ванал цува зузисса кIанттурдай бусравну ва хIурматрай кьариртссар цалла цIа. Жува буржлувссару укунсса инсантурая хъирив нанисса никрирахьгу пахрулий буслан, – увкунни Айдиевлул.
Ппу дакIнийн утлатисса ихтилат бунни Султан Мусаевлул душ Жавгьарат ХIусайновал.
– Жул ппу ия шяраву хъинну сий дусса, дурккусса, хъунисса къуллугъирттай зий, цала цIа марцIну дурурччусса инсан. ИчIувагу ва икIайва кулпатрах, оьрчIах хъинну аякьа дусса инсан. Ванал на, лувдуш бунугу, цала аьзизсса душ кунма кьамул бувссара кулпатравун. Султан-мяммал ттун буттал кIану бувгьуссар. ЦукунчIав на цалами оьрчIая личIи къабувссара. Барчаллагьрай бура жул буттал аьпа абад бан, чIарав бацIан бувкIсса, ва давривух гьурттушинна дурсса цинявннайнмагу», – увкунни Жавгьаратлул.
Мажлисрай ихтилат бунни Камил Саэдовлулгу. Ванал барчаллагь увкунни ва ххаллилсса даву дузрайн дуккан дансса сипталий бувксса ванал мачча-гъанминнахь ва цинявппагу чIарав бавцIуминнахь.
– Укунни зун аьркинсса, укунсса давурттайнур республикалул кьатIувгу жула сий гьаз хьунтIисса, жагьилсса никирангу жула вирттал кIулну бикIантIисса, – увкунни министрнал.
