ЦIу буккан бунни Шушиннал школа

Гьашинусса шинал республикалий гьануцIакул къатри цIу дуккан даврин хас дурсса федерал программалул лагрулий ремонт бунни цикссагу школартту ва детсадру. 2022-ку шинал ва программалул лагрулий ремонт буллай буссия ЦIуссалакрал райондалийсса Аьрасатнал Виричу Дмитрий Серковлул цIанийсса Шушиннал школа. Вай гьантрай шикку цIуницIакул даххана дунни школалул магъи.

Дуккаврил шин дайдишин хьхьичIсса гьантрай, Шушиннал школалул директор Шакират Абакаровал экскурсия бувну, нитти-буттан ккаккан дунни школалул къатраву дурсса ремонт.
Нитти-буттагу хъинну ххари хьунни школалий дурсса ххаллилсса давурттая. Школа цIу бу­ккан бан кумаг баврихлу, нитти-буттал чулуха Республикалул БакIчи Сергей Меликовлуйн барчаллагь баян бунни 11-мур класс­рал дуклаки душ ПатIимат Исяевал ниттил.

«Нитти-буттал комитетрал чулуха дакIнийхтунусса барчаллагь учин ччай бура, жула оьрчIру дуклакисса школа цIу буккан баву мурадрайсса давурттавух кабакьу бувсса Республикалул БакIчи Сергей Меликовлуйн. Школалий махъсса шиннардий гъарал ларчIун махъ, цаппара кабинетирттавун щин дуклай, оьрчIру авара хьуну бикIайва. Хаснура, спортзалданувун щин дуклай, физкультуралул учительнаща дарсру дишин къахъанай дур тIий, аьрзирай бикIайва жул оьрчIру», – тIий буслай бур нитти-буттал комитетрал хъунмур.