Дуккаврил шинал дайдихьулий ЦIуссалакрал райондалий хьунни гьарица шинал август зуруй дайсса педагогтурал совещание.

Совещаниялул даву дайдишин хьхьичI гьурттучитурал ва хъамаллурал ххал диргьунни райондалул администрациялул къатрал хьхьичI тIиртIусса «Достижения и перспективы развития дошкольного, общего и дополнительного образования в рамках реализации национальных проектов» тIисса выставка.

Муния махъ актовый залдануву дайдирхьунни совещаниялул даву. Шикку гьуртту хьунни ЦIуссалакрал райондалул бакIчинал цалчинма хъиривчу Султан ХIамзаев, райондалул бакIчинал хъиривчу Рустам Сулайманов, ЦIуссалакрал райондалул кIулшиву дулаврил управлениялул хъунмур Светлана Къудаева, шяраваллал администрациярттал хъуними, райондалул школарттал педагогтал ва Дагъусттаннал кIулшиву дулаврил министерствалул профобразованиялул отделданул хъунмур Дина Кунтуганова.

КIулшиву дулаврил давриву дурсса хIасиллая ва гихуннай дантIисса даврил пландалия бусласисса балжийсса ихтилат бунни Светлана Къудаевал. Хъирив ихтилатру бунни райондалул школарттал педагогтурал.
Совещаниялул ахирданий давриву хьхьичIунсса хIасиллу хьун дурсса педагогтуран дуллунни хIурматрал грамотартту.