Лакрал райондалул администрациялий хьунни кIулшиву дулаврил зузалтрал аьдатравун дагьсса Август зурул совещание.
Муний гьуртту хьунни райондалул бакIчи Юсуп МахIаммадов, ДР-лул кIулшиву дулаврил ва элмулул Министерствалул вакилтал.
Юсуп МахIаммадовлул кIицI лавгунни кIулшиву дулаврил агьамми суаллу.
«КIулшиву дулаву – му дур хъинну агьамсса ва аьркинсса ара. Мунил тагьаргу дагьлай дур так ца педагогтурайн ва дуклаки оьрчIайн дакъасса, щала жяматрайн.
ЦIусса дуккаврил шин дайдихьулийн оьрчIру кьамул бан хIадурну бур цинявппа школартту ва детсадру. Зун дакIний бухьурча, мяйра шинал хьхьичI райондалийсса ацIния ряхва школалува ацIния мукьва буссия лекьавайсса тагьарданий. УрчIва школа бия хъуручIрай лахълай. Махъсса шиннардий, личIи-личIисса программарттаву гьуртту шаврийн бувну, жущава бювхъунни капитальныйну ремонт бан ацIния кIива школа, миву отопление дишин, пищеблокирттавун щин дуцин.
Ларгсса шинал Гъумук тIитIарду ттизаманнул матахIрал лащу-щаллусса школа. Умуд бур школалул педагогтурал дуклаки оьрчIал кIулшиврул даража лавай бан бюхъансса куццуй, мюнпатну ишла дулланссар ва оборудование тIисса. КIулшиву дулаврил управлениялун, школарттал каялувчитуран гьарза-гьартану ишла дуллан багьлай бур «Земский учитель» федерал программалул каширду, хьхьичIунсса пишакартал школарттайн кIункIу баншиврул. Ххисса шартIру аьркинну духьурча, райондалул администрациялул ми ххал дигьинтIиссар.
Райондалул ялун бучIантIимур оьрчIал кIунттихьри бусса.
НахIакь бакъар кIулшиву дулаврин гьарца шинал 60 % бюджетрал харж буллалиссагу. КIулшиву дулавриву арцу дихьлай, жущава бюхълай бур хьхьичIуннайшивурттайн умуд бишин, олимпиадарттай, аттестациярттай, учительтурал пишакаршиврул давриву», – увкунни райондалул бакIчинал.
Муния махъ совещаниялий гьуртту хъанахъиминнан ккаккан дурунни Аьрасатнал кIулшиву дулаврил министр Сергей Кравцовлул видеообращение, микку ванал бувсунни батIлай бушиву НасихIатчинал ва педагогнал шинал дансса давурттансса маслихIатру.
Ларгсса дуккаврил шинал хIасиллая ва ялун нанисса дуккаврил шинал хьхьичI бихьлахьисса мурадирттая бувсунни КIулшиву дулаврил управлениялул каялувчи Тамерлан МахIаммадовлул. КIицI лавгунни кIулшиву дулаву хьхьичIуннай даврил агьамми ххуллурду.
Конференциялул хIасиллу дуллай, ЦНППМ-лул каялувчи Залму Оьмаровал кIицI лавгунни Лакрал райондалул КIулшиву дулаврил управлениялул ва идарарттал даву хьхьичIунсса ххуттай душиву.
Ахирданий, аьдатравун дагьсса куццуй, хьхьичIунсса кIулшиву дулаврил зузалтран дуллуна КIулшиву дулаврил ва элмулул министерствалул чулухасса наградартту ва райондалул бакIчинал чулухасса ХIурматрал грамотартту.
