Августрал 29-нний хьунни ДР-лул МЧС-рал управлениялул каялувчинал хъиривчу Эльдар Хамавовлул пресс-конференция. Муний ххал бивгьунни цIусса дуккаврил шинал хьхьичI профилактикалул давуртту даврил хIакъиравусса масъалартту.
Мунал тIимунийну гьар шинах надзорданул ва профилактикалул давуртту дайдишайсса дур майрая тIайла хьуну.
Ми давурттал лагрулий школартту ххал байсса бур цIу лачIавриясса мюхчаншиврул тIалавшинну дуручлай бушиву. Августрай ххал дайсса дур школарттай ялун личин дурсса диялдакъашивуртту духлаган дурну душиву. Дуклаки оьрчIан лахьхьин байсса бур цIу лещан дайсса куц. Мукунсса давуртту дайсса дур гьарца дачIишинал мутталий.
Гьашину профилактикалул давурттал чIумал 500-нниха ливчусса школартту кIункIу бувну бур административ жаваблувшиврийн, цила чIумал духлаган къадурну тIий мюхчаншивруцIунсса диялдакъашивуртту. Агьамми диялдакъашивуртту хьуну дур: цIу лачIаврил системалул сигнализация дакъашиву ягу му зий дакъашиву, электрооборудование зузи даврицIунсса тIалавшинну къадуруччаву, цIу лещан дувансса кьай-кьуй ва аьркинссаксса щинал дузалну къабикIаву.
– ДукIу 7 школалуцIух цIу ларчIун, лещан дуван хьуну дур. Башттанма ччувччуну бивкIссар 1 школа Ххунзахъиял райондалий, – кунни Хамавовлул.
Муналва бусаврийну, гьашину тамансса школартту бакьин буллай бур. Ми бакьин бавриву хъуннасса къулагъас дуллай бур цIу лачIавриясса мюхчаншиврух. Гьашину 11 школалий пачру букьан бувну, кIирисса ссихIирай (парданий) гъили буллан тIий бур классру.
