Лакрал райондалий 1-мур классравун лавгунни 80 чIивитIу

Гьашинусса дуккаврил шинал цалчинсса кьини Лакрал райондалий цалчинсса занг рирщунни 1-мур классравун нанисса 80 чIивитIун. Вайннавату 36 чIивитIу увххунни Гъумучиял дянивмур даражалул школалул нузкьунттавух. КIулшивурттал кьинилун хасну ва школалий хьусса шадлугърай гьуртту хьунни ДР-лул культуралул министр Зарема Буттаева, ДР-лул Халкьуннал Мажлисрал депутат Марат Илиясов, Лакрал райондалул бакIчи Юсуп МахIаммадов, райондалул идарарттал бакIчитал.

БавтIминнал хьхьичI махъ лахълай, райондалул бакIчинал увкуна:
– Ххирасса оьрчIрув! Вана дуркIун зучIан дуккаврил цIусса шин. Ва кьини яла-яла асар хьунсса дикIай 1-мур классравун наниминнан, мукунссарив гьашину жулла райондалий ур 80 оьрчI. Лавайми классирттал оьрчIаннив дайдихьлахьиссар пиша ва гихунмайсса оьрмулул ххуллу язи бугьавриву жаваблувшинна дусса шин.
ХIурмат бусса оьрчIрув! Дуклакияра гъирарай, хIарачатрай, ласласияра цIу-цIусса кIул­шивуртту. ДакI дарцIуну ура зу школалий ласунтIишиврий гьарцагу чулуха за кIулсса, итххявхсса инсантуран ккаллину бикIаншиврул чара бакъа аьркинсса кIулшивуртту, цанчирча махъа нанисса жагьил­сса никри жулла райондалул бучIантIимурну хъанахъисса. Зун ххуллухъин баннав!
Юсуп МахIаммадовлул ва Марат Илиясовлул чулуха 1-мур классравун нанисса цинявппагу оьрчIан буллуна школалийнсса аьркинмунищалсса портфеллу. Укунсса портфеллу гьарца дуккаврил шинал дайдихьулий булайссар мюрщултран. Портфеллу цивппагу буллалиссар «Единая Россия» партиялул дуккаврил шинал хьунин гьар шинах бартдигьлагьи­сса «Собери ребенка в школу» тIисса ихIсандалул акциялул лагрулий.

Зарема Буттаевал педагогтал, оьрчIру ва вайннал нину-ппу Дагъусттан Республикалул БакIчи Сергей Меликовлул цIания барча бувна.
– ХIакьину щаллагу республикалий 450-азарунния ливчу­сса оьрчIал ласунссар школалул бухкIуллуйхсса шаттирду, вайннаватугу щаллагу республикалий цалчинмур классравун наниссар 55 азара оьрчI. ДакI ххари дуллай дур билаятрал ва республикалул каялувшиннардал махъа нанисса никиран кIулшивуртту дулаврих дуллалисса хъуннасса къулагъас чIалай. 2022-ку шинал «Модернизация школьных систем образования» программалул лагрулий 210 школалий дуллалиссар капитальный ремонтру, планнаву дуссар цIусса 4 школа тIитIавугу.
Ва байрандалул кьини дакI­нийхтунусса барчаллагь тIий бура педагогтурахь буллали­сса хъунмасса захIматрахлу ва кIулшиву хьхьичIуннай давриву, жулла республикалул ва билаятрал бучIантIимуниву бихьлахьисса багьа бищун къашайсса бутIухлу. Цалчинмур классравун нанисса мюрщултран чIа учивияв хIарачат бу­сса, вичIидихьлахьисса оьрчIру шаву. Дуклакисса цинявннанмагу – бухкъалагайсса, хьхьара къашайсса гуж, кIулшивурттахсса мякь, – увкуна Республикалул культуралул министрнал.
Школалун дуккаврил цIусса шинал дайдихьулийнсса бахшишну ванил музыкалул центр буллуна.
Дуккавриву, спортраву, школалул жяматийсса оьрмулуву хьхьичIуннайшивуртту кка­ккан дурсса оьрчIан дуллуна ХIурматрал грамотартту.
Хъирив дуклаки оьрчIал ккаккан дурна концертрал программа. Шадлугъ къуртал хьуна цалчинсса гюнгутIул лахъсса чIунийну.

Зарема Буттаева бивунни Гъумучиял музейравун

Дуккаврил цIусса шинал дайдихьулун хас дурсса шадлугърал линейка къуртал хьуну махъ Зарема Буттаева райондалул бакIчи Юсуп МахIаммадовлущал бивуна Гъумучиял М. Маннаровлул цIанийсса музейравун, ялтту бувккуна шикку нанисса капитальный ремонтрал давурттал. Шикку кIицI лаган, капитальный ремонт дуллалиссар Дагъусттан Республикалул Культуралул министерствалул чIарав бацIаврийну. Дурсса ва дуллалисса давурттая министрнахь буслай, подрядчикнал увкуна:
– ЦIанасса ппурттуву жу гипсокартонналийну гъили буллай буру чIиртту. Отопление дирхьуссар, чани бувцуссар. Ца-кIива гьантлувун къатрал лажинчулданулсса – фасадралсса булланссару, – куну.
ДакIнийн бутан, ва музей хъанахъиссар ДР-лул А. Тахо-Годил цIанийсса Национал музейрал филиалну.

Цинявппагу цачIуну – терроризмалийн къаршину

Аьрасатнал Федерациялий терроризмалийн къарши бацIаврил Комплексрал план щаллу даврил лагрулийсса ва агьалинаву хьхьичIунсса граждан позиция итххяххан баву мурадрайсса даву хьунни Гъумук Терроризмалущалсса талатавриву цачIун шаврил кьини. Шадлугъ хIадур дурну дия райондалул администрациялул, МВД «Лакский» МО-лул ва ЦСОН-лул цачIуну.
Райондалул бакIчинал хъиривчу Явсупи ХIамзаевлул ва райондалул Спортрал ва туризмалул отделданул начальник Малик ХIусмановлул тIутIив дирхьуна къуллугърал бурж биттур буллай жанну дуллу­сса зузалтран дацIан дурсса мемориалданучIа.
Шикку хьусса митинграй махъру лавхъуна Явсупи ХIамзаевлул, Малик ХIус­мановлул, райондалул КIулшиву дулаврил управлениялул начальник Темирлан МахIаммадовлул, балугъравун къабувхминнал иширтталсса буллалисса хъунама инспектор Камила Макьсудовал, ЦСОН-лул ва райондалул цаймигу идарарттал зузалтрал.
МемориалданучIа дишинсса тIутIащал бувкIун бия райондалул администрациялул, ЦСОН-лул, КIулшиву дулаврил управлениялул, низам дуруччаврил органнал зузалт ва Гъумучиял дянивмур даражалул школалул педагогтал ва дуклаки оьрчIру.
Ва кьинилун хасну райондалул школарттай дурна классрал ссятругу.