Аьрасатнал ПаччахIлугърал ттугълил кьинилун хасну ЦIуссалакрал райондалий аьдатравун багьну бур триколор-ленточкарду бачIлачIисса патриот зумувнусса акцияртту дуллалаву.
Августрал 22-нний, Аьрасатнал Ттугълил байрандалул кьини волонтертурал ЦIуссалакрал райондалий бавчIунни 200-нийн бивсса ленточкарду. Райондалул жяматрахь волонтертурал бувсунни байрандалул тарихрая ва Аьрасатнал ттугълия.
Акциялул сакиншинначи, ЦIуссалакрал райондалул Культуралул управлениялул хъунаманал хъиривчу Заур МахIаммадовлул кIицI лавгунни, жагьилтурал дянив дачин дуллан аьркиншиву миллатрал тарих кIулну бикIаву мурадрайсса патриот зумувнусса насихIатирттал акцияртту.
Ва ххуллухсса акциялул мурадгу бия, жула агьалинан ПаччахIлугърал агьамсса лишан ва билаятрал культура кIулну ва кьадру-кьиматрай дикIаву.
