Август зурул 20-нний, ххуллункьини, Карашрал Жяматрал советрал инициативалий хьунни шяраваллил агьалинал агьамсса масъалартту ххал бигьлагьисса батIаву.
Микку ца яла хьхьичIун лавсмур масъалану бия Карашрал шяраваллил тарихийсса объектну хъанахъисса, чIярусса шиннардий К. Маркслул цIанийсса колхозрал конторанугу, культуралул къаттанугу, цайми-цаймигу социал къуллугъирттал кIанттунугу диркIсса здание ччясса чIумул мутталий ххассал дансса чаран къалякъирча, эяллай дацIан най душиврул масъала.
Цумур чулуха хIисав дарчагу, кIа здание ккалли хъанай дур жула щалагу жяматрал хъус-хъиншивуну, ирсирай ядан аьркинсса архитектуралул ва культуралул гьайкалну.
Жула бур хъунмасса тарих бусса мизит, бур аьнтIикIасса минара. КIа минара тия, шагьраххуллуя, ххал хьуну, тамаша бивзун, кIа ккаккан шяравун букIлакIиссагума чан бакъар – ччарча жула Дагъусттаннаясса, ччарчагу чил кIанттурдаясса туристътал. Амма ми хъамаллурал янилу, мизитрачIангу, минаралучIангу бияннин, найбунува бацIайхьунссар кIа оьккишиялийн кIура бавсса, заллу-зал ухлавгсса кунма чIалачIисса контора, ва кIа кIукун личIаврил, личIан битаврил мяънагу лаласун къабюхълай бикIайхьунссар.
Му бакъассагу, ххал бара, ябитира кIа жула шяраваллил Хъун-КкурчIагу ци чIалачIиндарай бурив! Жула буттахъул, буттал буттахъул ттуршрахъул шиннардий щябикIлай-бизлай бивкIсса ккурчIа хIакьину бур ккаччи къабацIансса тагьарданий. Му жуйра цинявннайсса кьюкьала дакъарив?!
ХIасил, ихтилат лахъи къабан, МахIачкъалаливсса Карашрал Гаражрай хьусса га батIаврий лавхъсса махъругу, бувсса маслихIатругу, жул пикрилий, бия цалийн букIлакIисса – жуласса жува къабулларча, жула язи-язими мурадру бартбигьинсса ххуллурду жува къаляхъларча, аманат аьтIисса хьун най бушиву.
Циняв рязисса маслихIатну хьунни тIитIин Карашрал жяматрал фонд ва му фондравунгу цIубутIуй дичин Карашрал агьалинал гьарца кулпатрая 2000 къурушраяр чан дакъасса арцу, цала кашилух бурувгун. Гьай-гьай, шикку цукунчIавсса ялув духIлахIаву дакъассар – гьарцама цува рязину.
Цуманал чулуха циксса дирчуну дуривгу ккаккан дуллантIиссар Фондрал группалуву тIиртIусса тIайланнасса сияхIрай. Сакин бувну бикIантIиссар му Фондрал мурадру официальнайну бартбигьлансса комиссия, мунил каялувчинугу икIантIиссар Аьппаслул арс ТIагьир Къаллаев. Му комиссиялул составгу, тIиртIусса счетрал номергу баян бантIиссар Фондрал группалул лажиндарай.
Ттинин кумунил ялун ца зат ялагу ххи бан ччива. КIа жува тIисса конторалул здание ччаннай цIакьну дацIан дурну мукьах, кIанил лувчIиннийсса, биялну гьарза-гьартасса помещениялуву жущава тIитIин хьунссия Карашрал шяраваллил ва буттал улклул тарихийсса музейгу. Мугу ккаллину хьунссия жура дурсса ца кьадру-кьимат ххишаласса даврин.
https://youtu.be/DNWG6h-5jEE
ТIайламур бусан, ва макьала чичлачисса чIумал, нава цукуннив ца намусравгума агьсса куна хьуна. Цанбакъарча укунссагу, ванияр ялттуссагу масъалартту цайми-цайми жяматирттал ванияр ххюрагу, ацIрагу шиннардил хьхьичIва бартбивгьуну буну тIий.
Руслан Башаев
