ХьхьичI ххуттай дур туризм

ПаччахIлугърал Советрал Секретарь, Президентнал кумагчи Игорь Левитиннул Владимирдай дурсса совещаниялий ххал бивгьунни туризм хьхьичIуннай даврил ва хъамал кьамул баврил индустриялул масъалартту. Совещаниялий гьуртту хьунни Дагъусттаннал региондалул БакIчи Сергей Меликов, Аьрасатнал регионнал каялувчитал, жяматийсса идарарттал ва бизнес-сообществардал вакилтал.

Игорь Левитиннул кIицI лавгунни, «Аьрасатнал Федерациялийсса туризм хьхьичIуннай даврин» хас дурсса совещаниялийн хIадур хъанай, хъирив бивзун, ххал бивгьушиву туризмалул инфраструктурарду къулай даву мурадрайсса, туризм сакин даврицIун бавхIусса цинявппагу масъалартту.

Совещаниялий гьуртту хъанахъиминнахь балжийну бувсунни Владимирский областьрайсса туризмалул даврия. Шикку гьаз бунни тарихийсса гьайкаллу ядаврил, халкьуннал сянатру машгьур даврил, туристътал ххилансса транспорт нирхиравун рутаврил ва цаймигу масъалартту. Аьрасатнал Федерациялул субъектирдал ва бизнесрал вакилтурал бувсунни туризмалул аралувусса бизнес-проектру зузи даврил практикалия.

Совещаниялий, туризм хьхьичIу­ннай даву мурадрай кIицI лавгсса цинявппагу маслихIатру хьхьичIун ласун­тIиссар АьФ-лул ПаччахIлугърал Президиумрал Советрал заседаниялий.