Дагъусттаннал ХIукуматрал Председатель Аьбдулмуслим Аьбдулмуслимов августрал 23-нний увкIунни Бабаюртуллал райондалийн.

Цаппара цIуну буллалисса ва бакьин буллалисса объектирттайн ва АПК-лул объектирттайн ивну махъ, премьер-министрнал дунни муниципалитетрал социал-экономикалул лябуккулул хIакъиравусса батIаву.

Мунал бусаврийну, Бабаюртуллал рйондалий дур хъинсса ялун бучIанмур бусса лябуккулул каширду, миннувух – шяраваллил хозяйствалул бутIулссагу. Мунал бувсунни микку аьркинну бушиву гьарта-гьарза дуван къама ва ппиринж бугьайсса хъуру.

Муниципалитетрал экономикалул тагьарданул хIакъираву махъ лавхъунни ДР-лул экономикалул ва территориал лябуккулул министрнал кIанайма Аьдилхан ХIажиевлул. Мунал бусаврийну, 2022-ку шинал республикалул инвестициярттал программалул лагрулуву ккаккан дурну дур 6 объект бувансса арцу итадакьин, миннувух 3 дуккаврил, 1 спортрал , 1 – газрал дузал баврил объект ва 1 – щинал дузал баврил объект. Пландалий бур тIитIин 1 спортрал объект. Масъаларттал хIакъираву махъ лавхъунни муниципалитетрал бакIчи Даниял Исламовлул. Мунал бувсунни Бабаюртуллал район ляду­кканшиврул дуллалисса давур­ттал ва захIматсса масъаларттал хIакъираву.

Яла Аьбдулмуслим Аьбдулмуслимовлул бувсунни ххал бигьин аьркинну бушиву кIинтнил даэрдал аьрщарал масъалагу. Мунал тIимунийну, Сергей Меликовлул республикалул ХIукуматрайн тапшур бувну бур ДР-лул Халкьуннал Мажлисращал цачIу хIадур буван циняв захIматсса масъалартту закондалийн чул бивщуну. КIинтнил даэрдал аьрщив мюнпатну ва цила мурадрай ишла даврил темалул хIакъираву хъунмур махъ лавхъунни ДР-лул ХIукуматрал Председательнал хъиривчу, ДР-лул аьрщарал ва хъус-хъиншиврул министр Заур Эминовлул.
Мунал тIимунийну, хIуку­матрал закондалийну кIинтнил даэрдал аьрщив хъанахъиссар шяраваллил хозяйствалул категориялул аьрщивну.

«Цаппара СПК-лул заллухъруннал аьрщив арендалий ларсун дуна, миннухсса багьа буллай бакъар хIукуматран. Му бакъассагу, цаппараннал аьрщив дуллай бур цайминна­хьхьун субарендалий, арендалухсса багьагу къабуллай», – бувсунни Эминовлул. Мунал мукунма кIицI бунни, цIанасса ппурттуву мукунсса цаппара уголов деларду судрай ххал дигьлай душиву.
Масъалалул хIакъираву ихтилатру бунни цаппара кIанттул ялапартуралгу.
БатIаврил хIасиллайн бувну цаппара министерстварттайн ва идарарттайн дунни тапшурлугъру, чивчунни протоколгу.