Август зурул 16-нний Да­гъусттан Республикалул ХIу­куматрал председатель Аьбдулмуслим Аьбдулмуслимовлул каялувшиндарай хьусса совещаниялий гьаз бунни «Образование» ва «Демография» тIисса миллатир­ттал проектирдал лагрулий буллай бивкIсса школартту тIитIин хIадур баврил хIакъиравусса ма­съалартту.

Премьер-министрнал кIицI лавгунни, 2022-ку шинал сентябрь зурул 1-нний республикалий тIитIин най бушиву 1606 оьрчIансса кIану бусса 4 цIуну бувсса школа ва 2560 оьрчIансса кIану бусса 15 оьрчIал багъ.

Цал архIал 3 цIусса детсад зий байбишинтIиссар МахIачкъалалив, Богатыревка поселокрай – 200 оьрчIансса кIану бусса, ЦIусса Хушетрай – 250 оьрчIансса кIану бу­сса ва А. Аьлиева 32-мур кIичIираву – 60 оьрчIансса кIану бусса). Каспийскалийгу цIуну бувсса садикру зунтIиссар «Кемпинг» 34-мур МКР-лий 250 оьрчIансса кIану бусса, 36-мур МКР-лий ва 11-мур МКР-лий 250 оьрчIансса кIану бусса.

Мукунма миллатирттал проектирдал лагрулий буллай бивкIсса 120 оьрчIансса кIану бусса садикру зий байбишинтIиссар Къаякантуллал райондалийсса Сагаси Дейбук ва ЦIусса Викри тIисса шяраваллаву. Вара проектрал лагрулий буллай бивкIсса садикру зий байбишинтIиссар Къарабудагъкантуллал райондалийсса Къарабудагъкант ва Доргели шяраваллаву.
Дуккаврил шинал дайдихьулий тIитIинтIиссар миллатирттал проектирдал лагрулий буллай бивкIсса 2 цIусса школа Хасавюртуллал райондалий, ца Эндирей шяраву – 502 оьрчIансса кIану бусса ва ЦIуссакостек шяраву 400 оьрчIансса кIану бусса.

Совещаниялий ХIукуматрал председательнал бувсунни вай объектирдал давриву аьл­тту хьуну диркIсса санитар законодательствалул чулухасса диялдакъшивуртту духлаган дуршиву.
ПаччахIлугърал заказчик-застройщик дирекциялул ва ГВСУ-4-лул вакилтурал бусаврийн бувну, цIанасса ппурттуву цаппара объектирдай хьунабакьлакьисса масъалартту бур лицензиярттал ва ихтиярдал документру дузал баврил хIакъиравусса.

Дузал дурсса объектирдая бувсунни «Дирекция единого государственного заказчика-застройщика» ГКУ-лул вакилтурал, школартту ва детсадру зузи баврил ялув бацIаву дайсса Аьрасатнал минобороналул 4-мур ГВСУ-лул федерал паччахIлугърал предприятиялул 412-мур строительствалул управлениялул.
Аьбдулмуслим Аьбдулмуслимовлул жаваблувсса къуллугъир­ттая тIалав бунни социал объектирдал строительствалул ва ми кка­ккан дурсса чIумуй къуртал баврил ялув бацIаву.