ЦIуссалакрал райондалий гьарица шинал аьдатравун багьсса куццуй, гьашинугу хьхьичIунсса хIасиллащал школартту къуртал бувсса выпускниктуран райондалул бакIчинал чулухасса мусил ссятру пиш-каш дуллалисса мажлис хьунни.

Август зурул 12-нний ЦIу­миналийсса администрациялул къатраву ЦIуссалакрал райондалул бакIчи МахIаммад-ХIажи Айдиев хьунаавкьунни хьхьич1унну дуклай бивкIсса выпускниктуращал ва миннал нитти-буттащал.

Шиккува кIицI лаган, Ма­хIаммад-ХIажи Айдиевлул сипталийн бувну, ЦIуссалакрал райондалий 2014-ку шиная шийнмай, мудангу лахъа-хъунну барча байссар, шинал лажиндарай хьхьичIунсса хIасиллащал дуклай бивкIсса оьрчIру. Му бакъассагу, райондалул бакIчинал сипталийн бувну дуссар дуклаки оьрчIан дуккаврихсса гъира-гьавас бутаву мурадрайсса цаймигу цIушиннарду. Ванал хIарачатрайну, хьхьичIунсса хIасиллащал ВУЗ-ру къуртал бувсса цикссагу студентътал давурттал дузал бувссар.

Гьашину, дуккавриву ва школалул оьрмулуву хьхьичIунсса ккаккияртту хьун дурсса оьрчIру барча буллалисса мажлисрай гьуртту хьунни школарттал директортал, учительтал ва оьрчIал нину-ппу. Выпускниктал барча буван ЦIуссалакрал райондалийн увкIун ия ДР-лул кIулшивуртту дулаврил министрнал цалчинма хъиривчу МахIаммад Аьбидов.
Гьашину, райондалул бакI­чинал чулухасса мусил ссятру пиш-каш дунни марцIсса ххювардай ва мусил медальлащал школартту къуртал бувсса 25 выпускникнан.
Мажлисрай личIинува кIицI лавгунни хьхьичIунсса хIасиллащал ЕГЭ-рду дуллусса ЦIуссаккуллал школалул выпускница Алина Маккаева. Ванин райондалул бакIчинал чулухасса мусил ссят дакъассагу, буллунни Барчаллагьрал чагъар ва 50 азарда къуруш дусса сертификатгу.

Ва кьинисса мажлисрай Барчаллагьрал чагъарду ва тIутIал кацIру пиш-каш бунни выпускниктурал ниттихъангу. МахIаммад-ХIажи Айдиевлул лавайсса кьимат бивщунни хьхьичIунну дуклакисса оьрчIан ва миннащал зий бивкIсса учительтурал захIматран.

– ДуркIунни так, цала хIа­рачатрайну ва куртIсса кIул­шивурттайну хьхьичIунсса кка­ккияртту чIалачIи дан бю­хъайсса чIунну. Зу, ялун нанисса ник – райондалулгу, республикалулгу бучIантIимурду. Умуд бур гихунмайгу, бацIаву дакъа куртIсса кIулшивуртту ласлай, уттигу цикссагу хъунисса ххувшавуртту ласлансса хIарачат булланссару, зуяту райондалул цIа-кьини бюхттул дансса инсантал букканссар тIисса, – увкунни МахIаммад-ХIажи Айдиевлул.

ОьрчIру барча буллалисса ва миннахь насихIатру бусласисса ихтилатру бунни министрнал хъиривчу МахIаммад Аьбидовлул ва ЦIуссалакрал райондалул кIулшивуртту дулаврил управлениялул хъунмур Светлана Кудаевал.
Мажлисрал ахирданий рирщунни дакIний личIансса сурат­ру.