Совет Союзрал кIийла Виричу АхIмад-Хан Султаннул цIанийсса МахIачкъалаллал аэропортрая август зурул 6-нний байбивхьунни Нальчик шагьрулийнсса рейсру дуллай. МахIачкъалаллал аэропортрая Нальчикрайнсса рейсру дуллантIиссар ЮТэйр авиакомпаниялул ATR- 72 маркалул самолетирттай, нюжмардий кIийлла – арвахI ва ххуллункьинирдай.
МахIачкъалаллал аэропортрая самолетру лехлантIиссар 16:10 ссятраву ва Нальчикрайн биллантIиссар 17:20 минутраву (1 ссят ва 10 минутрайсса бур гьаваллавухсса ххуллул манзил). Нальчикрая МахIачкъалалийнсса самолетру лехлантIиссар 13:50 ссятраву.
Нальчикраясса самолетру 15:10 ссятраву диллантIиссар МахIачкъалалийн.
ЦIуну тIиртIусса рейсрайнсса билетру бахлай буссар аэропортрал кассалий ва авиакомпаниялул сайтрай.
Шиккува дакIнийн бутанну, МахIачкъалаллал аэропортрай пассажиртурал чарабакъа дуруччин аьркинсса кьанунну:
– пассажиртураща регистрация дан бюхъайссар самолет леххан 2 ссятрал хьхьичI ва 40 минут самолет гьаваллавун гьаз хьун лирчIсса чIумуйн бияннин;
– чил билаятирттайнсса рейсирдайнсса регистрация дайдишайссар 3 ссятрал хьхьичI ва самолет леххан 1 ссят лирчIсса чIумуйн бияннин.
Регистрация дан чIал хьусса инсантал самолетрайн итабакьин ихтияр дакъассар!
Му бакъассагу, пассажиртурал багаж бикIан аьркинссар аэропортрал ккаккан дурсса лагрулийн бувнусса. Ккаккан дурсса кьяйдалул лагрулува ливчусса багажрах булун аьркинссар ххишаласса багьа. Багажрахсса багьа кIул бан бюхъайссар сайтрайн ягу авиакомпаниялийн оьвкуну.
