Шин ларгунни жула дянива ххаллилсса педагог, уздансса хъамитайпа МахIрамова ПатIимат Камалуттиннул душ лавгун. ПатIимат бия цила даву ххуйну кIулсса профессионал, лавайсса интеллигент, гьарца ишираву тIайлашиву дуруччайсса инсан. Ва бия дуклаки оьрчIан насихIатчи ва дакI тIайласса дус.
ПатIимат бувну бур 1973-ку шинал ЦIуссалакрал шяраву. ЦIуссалакрал дянивмур даражалул школагу къуртал бувну, дуклан бувххун бур Дагъусттаннал паччахIлугърал университетрал филологиялул факультетрайн. Университет къуртал байхту, зий бивкIун бур ЦIуссамехелтиял школалий. 1999-ку шинал хьхьичIунсса педагог тIалав бувну бур ЦIуссалакрал 1-мур школалийн. Муния махъ цаппара шинну дурну дур ПатIиматлул Сургутлив оьрчIал багъраву тарбиячину зий.
2008-ку шинал Дагъусттаннайн зана хьуну ЦIуминалийсса Аьхъардал шяраву тIивтIусса школалий завучну ва учительну зий бивкIун бур. Итххявхсса, хьхьичIунсса пишакар хIисаврай, 2014-ку шинал ПатIимат бувцуну бур Дагъусттаннал паччахIлугърал архивраву зун.
ХIайп, лавмартсса азар сававну дялирчIунни ванил дуллай бивкIсса элмийсса давуртту, дуклаки оьрчIащал дачин дурну бивкIсса ххаллилсса проектру. ПатIимат бия гьарца чулухунмай итххявхсса, цумур-духьурчангу цила бакIрайн ларсъсса даву дузрайн дуккан къадурну паракьат къашайсса инсан. Ванил ххаллилну нани дурну бикIайссия ялун нанисса никиран буттал улча лахьхьин буллалисса давуртту.
ПатIимат буссия ЦIуминалийсса Шушиннал школалул ТОКС-рал отрядрал каялувшивугу дуллай. Ванил каялувшиндарай буттал улклухасса ахттаршиннарду дуллай бивкIсса дуклаки оьрчIал республикалул ва республикалул кьатIувсса конкурсирттай, олимпиадарттай цимилгу цалчинсса кIанттурду бувгьуссар.
ПатIимат лайкь хьуну бур «Почетный работник воспитания и Просвещения Российской Федерации» тIисса хIурматрал лишандалун. Ванин дуллуссия «50 лет Телевизионному отряду краеведов-следопытов» тIисса юбилейрал медаль.
ПатIимат МахIрамова кьамул бувну буссия «Краевед Дагестана» тIисса журналданул редакциялул советравун. Мукунма ва буссия 2020-ку шинал Ххувшаврил 75 шинал юбилейран хасну итабавкьусса «Немеркнущий подвиг: дагестанцы на фронте и в тылу» тIисса луттирал соавторнугу.
Ккавкказуллал дяъвилул тема ахттар дуллай, ПатIимат МахIрамова бивссар Дагъусттаннал цинярда зунттал районнайн ва Чачаннавун.
Вай темардан хас дурсса «Юный краевед», «Мы дружбой народов сильны», «В зеркале истории : Дербенту – 2000 лет» тIисса республикалул ва Щалагу Аьрасатнал олимпидарттай, конкурсирттай гьуртту хьуну ванил учениктурал бувгьуссар хьхьичIунсса кIанттурду.
Ванил ппу Камалуттингу ЦIуссалакрал райондалул агьулданун кIулссия цалла даву ххаллилну кIулсса ветврачну. Нину Аслигу зий бикIайссия ЦIуссалакрал райондалийсса Анавар кумаграл хIакинну. ХIайп, оьрмулул дугьарасса ниттин багьунни аьзизсса душнил дард духIан.
Жунма ххирасса коллега жун тачIавгу хъамакъабитантIиссар.
Сулайман МахIаммадов,
ш. Чаравал
