Дагъусттаннай август зурул 10-нний презентация хьунни «Приключения в ауле мастеров» тIисса, зунттал шяравун агьсса шагьрулул оьрчIая ларсъсса, ряхра мультсериалданул. Проект дачин дурну дуссия Президентнал грантрайнусса 3,3 млн арцух. Дузрайн дуккан даннин дунияллия лавгссия ванил автор Руслан Салимагъаев. Утти ва проект чулийн дуккан дуршиву бувсунни «Альтус-групп» анимациялул студиялул каялувчи Динара ХIажиевал.
«Аул мастеров» цIанилусса цалчинсса 3 серия ларсун дур 2018-ку шинал. «Аул мастеров» сериялул мультфильмру ккаккан дурссар Дагъусттаннал школарттай ва «Альтус-групп» студиялул You-Tube каналданий.
«Жу хIукму бувссия авторнал бувсса захIмат бакIуйн буккан бансса», – тIий бур Динара ХIажиева.
Мультфильмрал художествалулмур бутIул каялувчи, художник-аниматор ХIамзат Исяевлул бусаврийн бувну, 2 D графикалий дурсса мультфильмру дур 6-8 минутрайсса. Вай сакин дуллай, зий ивкIун ур 6 инсан. Мультсериалданувусса агьамма геройну ур гъинттул чIумал шяравун бава-ттаттахъачIан увкIсса шагьрулул оьрчI. Шикку ванан лахьлай бур шяравусса оьрмулиясса чIявусса затру.
Шиккува кIицI лаган, мультфильмрал цIусса серияртту таржума дурну дуссар 12 миллатрал мазурдийн. Хъиривми серияртту дуккантIиссар сентябрь зуруй. Серияртту дишинтIиссар «Ростелекомрал» сайтрай ва You-Tube каналданий. Мукунна, мультфильмру ккаккан дуллантIиссар СКФO-лул регионнайсса школарттайгу.
Проектрал автор, «Альтус-групп» анимациялул студиялул каялувчи, Руслан Салимагъаев 2022-ку шинал 40 шинал оьрмулуву дунияллия лавгссар, цува ниттил увсса кьини, май зурул 8-нний.
