Жагьилсса никиран эбратран ишинсса инсанная бусан ччива ттун «Илчи» кказитрайхчIин, укунсса арс тарбия увсса миллатрайнгу барчаллагьрай.
Рутуллал райондалийсса Дюкъуллал шяраватусса ХIажинал арс Кьурбан Камилов увну ур МахIачкъалив. Ванал марцIну ххювардай къуртал бувну бур МахIачкъалаллал 16-мур школа. Дуккавриву итххявхсса оьрчI гъирарай гьуртту шайсса ивкIун ур математикалул, оьрус мазрал, биологиялул ва химиялул олимпиадарттай. ХьхьичIунсса кIанттурду бугьайсса, школалун пахрулунсса дуклаки оьрчI хIисаврай учительтурангу, архIал дуклакиминнангу ххирасса ивкIун ур. ДуккаврицIун спортравугу итххявхсса ва гьуртту шайсса ивкIун ур спортрал бяст-ччаллал тIуркIурдайгу. Хаснува ванан бокс ва футбол ххирасса бивкIун бур. 2016-ку шинал ванал ларсун дур боксрал мастер хьунсса кандидатнал цIа. Аьрали пиша язи бугьан гьуз учин увну ур, цала бусаврийн бувну, маччахъул аьралитал бушиврул, ми ванан оьрмулуву, багьу-бизулуву ккаккиялунсса бушиврул.
Ва дуклан увххун ур билаятрай сийлийсса аьрали учреждениялувун, командиртал хIадур бувайсса Аьрасатнал Федерациялул Минобороналул лаваймур Краснознаменное училищалувун («МВОКУ»). Ва училищалуву дуклай ивкIун ур 5 маршал ва ряхттуршунниха ливчусса генералтал. Выпускниктурава 96 лайкь хьуну ур Совет Союзрал Виричунал цIанин, 4 выпускник – кIийла Виричунал цIанин, 14 выпускник Аьрасатнал Виричунал цIанин лайкь хьуну бур.
Гьамин, ва сийлийсса училище къуртал бувну бур Кьурбаннул лейтенантнал чиндалуву. Училище къуртал бувайхту, ва Москавуллал областьрайн взводрал командирну гьан увну ур. 2022-ку шинал февраль зурул 24-нния шийнай ва Украиннайсса спецоперациялуву гьуртту хъанай ивкIун ур. ЦIу бутIуй – взводрал командирну, яла – мотострелковая роталул командирну. Ванал цимилагу ккаккан бувну бур талатаврил майданний цува нигь дакъасса, ватандалул мурадру буруччаврил цIаний кьянкьану ацIайсса хIакьсса хIаписар ушиву. Ванайн кIийлла щаву дирну дур, цIанакулгу кутIасса отпуск буллуну, хъин хъанай ур. Ва сантгу ишла дурну, жу ванащал хьунабавкьуссияв, ванахь цахьвагу, укун аслансса жагьил тарбия увсса нитти-буттахьгу барчаллагь учин. Хаснува, ххаллилсса тарбиялул гьану бивзсса ниттихь барчаллагь учин. Кьурбан цаятува, цала даврия буслан къаччисса, цIа дувайхту, ламусравун агьлагьисса жагьил лявкъунни. «Ватандалухсса ччаврил бияла мудангу ялтту буккаван аьркинссар, хаснува иширачIа патриот асарду хьхьичIунну бикIан аьркинссар», – тIий ур Кьурбан. Талатаврил биялсса опыт бусса командир хIисаврай курсантътуран ва жагьилсса командиртуран ци маслихIат бувантIиссия тIисса суалданухун жаваб дуллай, ванал увкунни: «Жул давриву тIайлашиву ххирасса, цаятура ва саллатIтурая тIалавшинна дусса ушиву агьамссар. Амма, тIалавшинна душивруцIун, саллатIтурай дакI цIуцIавугу чара бакъа дикIан аьркинссар», – куну.
Вана укун аькьилсса, адаврай къуццу тIутIисса ва асланну аьрали бурж биттур буллалисса ур зунттал билаятрал къучагъсса арс. Хъингу хьуну, Кьурбан аьрали бурж биттур буллан анавар уккантIиссар цIунилгу. Жуварив дакIнийхтуну барчаллагьрай буру укун виричусса арс тарбия увсса агьлу-авладрайн.
Мерьям ДевришевА
Москавливсса
Дагъусттаннал Культуралул центрданул член
